Sabti, April, 13, 2019 (HOL) –Madaxweynaha
dowladda Soomaaliya Maxamed Cabdullaahi Farmaajo ayaa si kulul uga hadlay
dibadbaxyadii cuslaa ee maanta ka dhacay magaalada Muqdisho, isaga oo sheegy in
aan marnaba la aqbali doonin dibadbaxyo rabashado wata dowladdu-na gacan bir ah
ku qaban doonto.
Madaxweynaha oo maanta khudbad
ka jeedinayay munaasabad lagu qabtay degmada Warta-Nabada [Ex Wardhigley] ayaa
sheegay in dowladdu marnaba u dulqaadan doonin sida uu hadalka u dhigay
dibadbaxyo burbur iyo dhibaato geysanaya, isaga oo dhinaca kale u tacsiyeeyay
qoyskii ay ka baxeen labadii ruux ee maanta Askari ka tirsan ciidamada dowladda
ku dilay magaalada Muqdisho.
‘’Wax kasta oo dhaca dowlad
baad doorateen, annagu ma xoog baan ku nimid, anaga rabitaankiina ku nimid,
qofkii wax tabanaaya ma aha inuu cadaalada iyo sharciga gacantiisa ku qaato, ma
aha inuu bur buriyo hantida Shacabka Soomaaliyeed, ma aha inuu gacan siiyo
Cadawga aan la dagaaleeno ee Argagixisada ah, banaan bax aan sharciyeysneyn ma
yeeleyno” ayuu yiri Madaxweyne Farmaajo.
Wuxuu sheegay in ay jiraan dhinacyo badan oo dibadbaxyada
ku lug leh, gaar ahaan waxaa uu farta ku fiiqay Ururka Al-shabaab oo sida uu hadalka u dhigay markii loo
adkaaday dagaalka raba ayuu yiri in ay
Shacabka ku soo dhax dhuuntaa.
Askarta dowladda Soomaaliya
ayuu ku amaanay doorka ay ku leeyihiin dagaalka ka dhanka ah Al-shabaab iyo wax
uu ugu yeeray [Cadawga] sidaa daraadeed dhamaantood aheyn dad wada xun.
‘’Ciidamadu ma wada xumo, qof
iyo labo wanaagsaneyn waa ay ku jiri karaan, askari kasta oo dil u geysta
shacab meel kasta oo uu gallo waan uga daba-taggi doonnaa’’ meel uu gabaad ka
dhigan karo ama uu ku baxsan karo ma jirto’’ ayuu yiri madaxweyne Farmaajo.
Madaxweynaha dowladda
Soomaaliya oo khudbadiisu u badneyd dhaleeceyn iyo hanjabaad ayaa soo hadal
qaadin marnaba dad la sheegay in ay maanta toogasho ku dileen ciidamada
dowladda xiliggii ay socdeen dibadbaxyada.
Mar uu soo hadal qaaday
taageerada dowladda ee shacabka Soomaaliyeed ayuu yiri’’ Waad ogtihiin
habeenkii nala doortay sidii aad noo soo dhaweyseen, ilaa iyo haddana shacabku
waa ay na taageersan yihiin, maxaa yeelay dowladdu waa dowlad nadiif ah, waa
dowlad amaanno leh, waa dowlad aan tuug aheyn ‘’ ayuu hadalkiisa raaciyay.
Magaalada Muqdisho ayaa maanta
waxaa ka dhacay dibabadxyadii ugu xoogga badnaa billihii ugu danbeeyay oo ay
dadweynuhu dhiggaan, iyaga oo cabanaya ciidamada dowladda oo dilal ula kac u
geysta dadka shacabka, waxaana rabashadii maanta dadka wax yeelladu ka soo
gaartay gaarayaan in ka badan 10 ruux oo dhimasho iyo dhaawacba leh.
C/raxmaan Diini,
Hiiraan Online
[email protected]
