Guddoomiye Jawaari oo shaaciyay ajandaha kulanka ugu soo horeeya ee Golaha Shacabka
Khamiis ,Maarso, 29, 2018 (HOL) – Guddoomiyaha Baarlamaanka Soomaaliya Prof
Maxamed Sheekh Cusmaan Jawaari oo galabta shir guddoomiyay kulankii Guddiyada joogta
Golaha, ayaa waxaa looga wada hadlay sidii
dib loogu bilaabi lahaa howlaha caadiga ahaa ee fadhiyada Baarlamaanka.
Kulanka oo ahaa kii ugu horeeyay ee uu ka soo dhax muuqdo guddoomiye Jawaari
tan iyo markii soo ifbaxay khilaafkan ayaa waxaa joogay guddoomiye ku-xigeenka labaad
ee Golaha Shacabka.
Laakiin waxaa kulanka ka maqnaa oo aan soo xaadirin guddoomiye ku-xigeenka
koowaad mudane Cabdiwali Muudeey oo horay u sheegay in ajandaha ugu horeeya ee
fadhiga Baarlamaanka uu noqon doono in cod la galiyo mooshinka laga keenay
guddoomiye Jawaari.
Kulanka ugu soo horeeya ee 31 ka Sabtida inagu soo foolka leh qabsoomaya
ayaa lagu sheegay in looga dooddi doono arrimo xasaasi ah sida xiisada ka
taagan degmada Beled-Xaawo, taasoo muujineysa khilaafka xoogan ee ka dhax jira
Golaha Shacabka.
Maalinta Sabtida ee taariikhda tahay 31 bisha March Guddoomiye kuxigeenka
1aad C/wali Muudey ayaa go’aamiyay in laga doodi doono mooshinka Guddoomiye
Jawaari.
Kulanka Sabtida ayaa laga cabsi qabaa inuu hareeyo qalalaase iyo fowdo,
hadii labada dhinac ee Xildhibaanada kala qeybsan ay isugu yimaadaan kulan uu
mid walba ajandihiisa gaar u yahay.
C/raxmaan Diini, Hiiraan Online
[email protected]