Khamiis ,Maarso, 29, 2018 (HOL) – Warar goor dhaw soo baxay ayaa sheegaya in
guddiga Joogtada Aqalka Sare uu kala diray guddigii uu u xil saaray xalinta khilaafka Golaha Shacabka, kaddib
markii ay ku guuldareysteen waan waantii ay ka dhex wadeen labada dhinac.
Kulanka guddiga joogtada ayaa waxaa shir guddoominayay guddoomiyaha Aqalka
Sare Cabdi Xaashi Cabdullaahi, waxaana la sheegay in saddex ka mid ah xubnaha
Guddiga ay u gudbiyeen istiqaalad ay isaga casileen Guddiga.
Xubnaha is casilay ayaa kala ahaa Senator Maxamed Amiin, Cabdi Qeybdiid iyo
Maxamed Axmed Mashruuc.
Warar ay heshay Hiiraan Online ayaa sheegay in guddiga uu soo kala dhaxgalay
khilaaf la xiriira habka loo wajayo xalinta Khilaafka Golaha Shacabka oo
maalmihii ugu danbeeyay Aqalka sare uu siweyn ugu howlanaa.
Xildhibaannada Golaha Shacabka qaarkood ayaa ku eedeeyay guddiga Aqalka sare
in uusan dhaxdhaxaad ka aheyn Khilaafka Golaha Shacabka oo ay la safteen
dhinacc kaliya.
Waxaa muuqata in hadda Khilaafka u dhaxeeya xildhibaannada golaha Shacabka
uu gaaray heerkiisii ugu sareeyay marka la eego fariimaha ay isku gudbinayaan
labada garab ee Baarlamaanku u kala jabay.
C/raxmaan Diini, Hiiraan Online
[email protected]
