Baarlamaanka Galmudug oo kulankoodii ugu horeeyay wada jir maanta ugu yeelanaya Dhuusa-Mareeb
Arbaco, Maarso, 28, 2018 (HOL) - Xildhibaanada Baarlamaanka maamulka
Galmudug ayaa maanta kulanoodii ugu horeeyay ku yaalanaya magaalada
Dhuusa-mareeb ee xarunta u ah Galmudug.
Baarlamaanada Galmudug iyo Ahlusuna ayaa 26-kii bishan lagu mideeyay magaalada
Dhuusa-mareeb, kaddib munaasabad halkaasi ka dhacday oo uu ka qeyb galay
Madaxweynaha Galmudug Axmed Ducaalle Geelle (Xaaf).
Kulanka waxaa shir guddoomin doona Guddoomiyaha Baarlamaanka Maamulka
Galmudug Cali Gacal Casir, waxaana xalay xildhibaanada lagu wargeliyay in uu
jiro kulan maanta oo Arbaco ah.
Baarlamaankan oo noqonaya kii ugu tirada badnaa marka loo eego
baarlamaannada kale ee dowlad gobolleedyada dalka ka dhisan ayaa tiradiisa lagu
sheegay 178 xildhibaan.
Ajandayaasha maanta la filayo in kulanka looga hadlo ayaa waxaa ka mid
ah ka doodista wax ka badalka Xeer hoosaadka Baarlamaanka, isbarashada
Xildhibaanada labada dhinac iyo dib u eegista Dastuurka Galmudug.
Xildhibaanada Baarlamaanka Galmudug ayaa xilligan wixii ka dambeeya waxa ay
ku shaqeyn doonaan Magaalada Cadaado ee xarunta Gobolka Galgaduud, maadaama
heshiiska uu ahaa in kulamada Baarlamaanka lagu qabto Cadaado.
C/raxmaan Diini, Hiiraan Online
[email protected]
