Al-shabaab oo markii ugu horeysay ka hadashay xiisada xudduuda ku saabsan ee Beled-Xaawo
Talaado, Maarso, 27, 2018 (HOL) - Afhayeenka Al-shabaab Sheekh Cali Max’uud
Raage oo wareysi siinayay Idaacada ku
hadashay Afka kooxda ee lagu magacaabo Andalus ayaa ka hadlay xiisada ka taagan
degmada Beled-Xaawo.
Afhayeenka ayaa sheegay in aysan aheyn tallaabada ay Kenya qaaday markii ugu
horeysay wuxuuna tilmaamay in Kenya ay ku soo duushay qeybo ka mid ah dhulka
Soomaaliya, isaga oo sheegay in falkan uu yahay mid u eg daan-daansi.
Waxaa uu ku eedeeyay maamulka Jubbaland in ay raali ka yihiin waxaa sida uu
hadalka u dhigay e’ in Kenya ay xadgudub
ku soo sameyso dhul Soomaaliyeed, isaga oo intaa ku daray in aysan u
suuragali doonin in Kenya ay heysato dhul Soomaaliyeed.
Afhayeenka Al-shabaab ayaa shacabka Soomaaliyeed gaar ahaan kuwa Beled Xaawo
ku ammaanay qaabka ay uga dhiidhinayaana tallaabooyinka Kenya ay qaadeyso.
Sidoo kale Afhayeenka Ururka Al-shabaab ayaa sheegay in ay diyaar u
yihiin in ay ka qeyb qaataan ololaha ay wadaan shacabka Beled Xaawo oo ay isaga
difaacayaan Kenya, isaga oo intaa raaciyay in arrintan aysan u dulqaadan doonin
oo ay jawaab ka bixin doonaan.
“Dowladda Kenya ma ahan markii ugu horeysay oo ay qabsato dhul Soomaaliyeed
oo dad muslimiin ahna ay gumeysato, waxaa ay ku soo duushay qeybo badan oo ka
mid ah dhul Soomaaliyeed, waxaan u aragnaa dulmi iyo duulaan, marna ma
aqbaleyno in Kenya ay ku soo xad gudubto dhul Soomaaliyeed’’ ayuu yiri Cali
Dheere.
Bulshada ku dhaqan degmada Beled-Xaawo ayaa maalmahan waday olole xooggan oo
ay kaga hortagayaan qorshaha dowladda Kenya ay ku doonaysay inay dari kaga
xayndaabto xuduuda labada Magaalo ee Mandhera iyo Beled- Xaawo.
C/raxmaan Diini,
Hiiraan Online
[email protected]
