Galmudug oo yeelatay xubnihii baarlamaan ee ugu tirada badnaa dowlad gobolleedyada
Talaado, Maarso, 27, 2018 (HOL) - Munaasabad lagu saxiixayay heshiiska midowga
Labada Baarlamaanka ee Galmudug iyo Ahlu Sunna ayaa lagu qabtay degmada
Dhuusa-mareeb ee gobolka Galguduud.
Madaxweynaha Galmudug Axmed Ducaale Geelle Xaaf iyo Madaxa Xukuumadda
Galmudug Sheekh Maxamed Shaakir ayaa kala saxiixday heshiiska isku darka labada
Baarlamaan, kaasoo ka dhigaya tirada Baarlamaanka Galmudug kan ugu ballaaran
baarlamaanada dowlad goboleedyada.
Guud ahaan marka la eego tirada baarlamaanka dowlad gobolleedka Galmudug
ayaa lagu sheegay in ay dhan yihiin 178 Xildhibaan, iyaga oo noqonaya tiradii
ugu badneyd ee uu yeesho baarlamaanka mid ka mid ah dowlad gobolleedyada dalka
ka dhisan.
Madaxweynaha Galmudug Axmed Ducaalle Geelle Xaaf oo munaasabadda soo xiray
ayaa sheegay in Galmudug ay guul gaartay, wuxuuna tilmaamay in uu dhaqan galay
balanqaadkii ay sameeyeen isaga iyo Madaxweynaha Soomaaliya, ee ahaa in
Baarlamaanka Galmudug ay ku shaqeeyaan xaruntooda Cadaado.
C/raxmaan Diini, Hiiraan Online
[email protected]