Talaado, Maarso, 27, 2018 (HOL) - Wasiiru dowlaha Arrimaha Dibadda iyo Iskaashiga Caalamiga Abdulkadir
Ahmed Kheyre ayaa xafiiskiisa ku qaabilay Safiirka dowladda Isutagga Imaaraatka
Carabta ee Soomaaliya Mohammed Ahmed Othman Al Hammadi.
Kulanka ayaa looga hadlay arrimo dhowr ah oo ay ka mid yihiin heshiiska
shirkadda DP World ee dekedda Berbera iyo arrimaha sharci ee ka dhalan kara ku
xadgudubkeeda madax banaanida iyo midnimada dhuleed ee Soomaaliya.
Wasiiru dowlaha Arrimaha dibada iyo Iskaashiga Caalamiga ayaa sheegay in
Xukuumadda Federaalka Soomaaliya ay barnaamijyada horumarineed u qeybinayso
dhammaan gobollada Soomaaliya iyadoo aan midna laga reebin, ayna aqbali doonin
in wax loo dhimo madax-bannaanideeda iyo tiirarkeeda qaran, ayna ogolaan doonin
heshiis kasta oo lala baalmaro.
Dhinaciisa, Safiirka Imaaraadka ee Soomaaliya ayaa carabka ku adkeeyay in
dalkiisa ay si buuxda uga go’an tahay ilaalinta, xushmeynta iyo taageeridda
madax banaanida Soomaaliya, midnimadiisa iyo bedqabka dhulkiisa, isagoo sheegay
laga maarmaanshaha sii joogteynta isku duwidda iyo wadatashiga ku qotoma
ballaarinta iyo qotodheereynta iskaashiga labada dal, kaas oo hubinaya
horumarka xiriirka Soomaaliya iyo Imaaraadka.
C/raxmaan Diini, Hiiraan Online
[email protected]
