Arbaco, April, 04, 2018 (HOL) – Hal qof ayaa dhintay shan kalena waa
ku dhaawacmeen degaanka Fadhi-gaab oo u dhexaysa Ceel-afweyn iyo Gar-adag oo
dhaca galbeedka gobolka Sanaag, kadib markii dabley beeleed iskaga
horyimaadeen.
Dagaalkan oo ay bilaabeen dabley
rasaas ku furtay dad meel maqaaxi ah ku sugan, taas oo albaabka u furtay colaad
mudo soo taagnayd oo dhowaanta la sheegay in la soo afjaray.
"Waxaa ku dhaawacmay shan qof,
midna waa ku dhintay dagaal dabley laba beelood u dhexeeya oo ka dhacay
fadhigaab maanta duhurnimadii, waxaana uu soo gaadhey gabal gaabkii" sidaa
waxaa u sheegay HOL Cali Xuseen oo ku sugan magaalada Gar-adag oo 16Km. u jirta
Fadhi-gaab.
Ciidmada Somaliland iyo
masuuliyiinta Gobolka Sanaag ayaa gaadhey deegaanka si ay u xakameeyaan colaada
labada beelood oo soo noqnoqotay sanado badan, xalkii u danbeeyeyna bishii aan
soo dhaafnay la soo gabagabeeyey.
Dadka degaanadaasi ku dhaqan ayaa la
sheegayaa in ay dhiilo colaadeed hortimi iyadoo magaalooyin badan ay wada
degaan iyadoo mararka ay colaadan oo kale dhacdana ay si siman uga bilaabmaan
colaadu, inkasta oo dadaal la sheegay in ay wadaan waxkaradka dadka degaanadaasi
wada dega.
Isu ciidansi xoogleh ayaa ka
soconaya degaankaas shaqaaqadu ka dhacday waxse la eegayaa awooda ciidan ee
kala dextaagan labada dhinac sida ay ugu mitidaan ilaa waaberiga hadii
Alle idmo.
Seynab Cabdi Warsame
[email protected]
Laascaanood G. Sool
