Isniin, April, 02, 2018 (HOL) – Madaxweynaha dowladda Soomaaliya Maxamed
C/llaahi Farmaajo ayaa khadka Taleefanka ugu hambalyeeyay ra’iisal wasaaraha
cusub ee dalka Itoobiya Abiy Ahmed oo maanta oo Isniin ah loo dhaariyay xilka.
“Waxaan u xaqiijiyay in aan ka dhabeyno xiriirkeena labada dal si kor loogu
qaado ganacsiga,maalgashiga iyo in la xoojiyo amniga gobolka,waxaana shaki ku
jirin in ra’iisal wasaare Abiy Ahmed xoojin doono wada shaqeynteena,” ayuu yiri
madaxweynaha Soomaaliya mar uu khadka Taleefanka kula hadlay ra’iisal wasaaraha
cusub ee Itoobiya.
Baarlamaanka Itoobiya ayaa ra’iisal wasaare u doortay Abiy Axmed,waxaana mar
uu maanta ka hadlayay munaasabadda xilka loogu dhaarinayay sheegay in
dowladdiisu ay diyaar u tahay in ay Eritrea kala shaqayso sidii loo xalin lahaa
muranka u dhaxeeya labada dal,iyada oo loo marayo wadada wada xaajoodka.
Bishii March 27, 2018, Xisbiga haya talada dalka Itoobiya ayaa Abiy Axmed u
doortey in uu noqdo guddoomiyaha xisbiga kaddib markii uu xilka iska casiley
ra'iisal wasaarihii Hilamariam Desaglen.
C/raxmaan Diini, Hiiraan Online
[email protected]