Xildhibaanno sheegay in aysan wali ka tanaasulin mooshinka ka dhanka ah guddoomiye Jawaari
Isniin, April, 02, 2018 (HOL)-
Inta badan Xildhibaannadii Golaha Shacabka ee waday mooshinka ka dhanka
ah Guddoomiyaha Golaha Shacabka Maxamed Cismaan Jawaari ayaa shaaciyay in
aysan jirin ka tanaasulid ku aadan mooshinkii ay wadeen.
Maalmihii u dambeeyay ayaa waxaa socday dadaalo la doonayay in lagu dhameeyo
khilaafka ka dhax taagan golaha Golaha Shacabka Soomaaliya, walow
mudanayaasha baarlamaanka qaar ee wada mooshinka ay ku adkeysanaya in
mooshinka la mariyo sharciyada oo la horgeeyo Baarlamaanka.
Maanta oo Isniin ah ayuu Qorshuhu ahaa in uu kulanka Golaha Shacabka furmo
laakiin waxaa warku uu sheegayaa in ay jiraan cilado farsamo, taasi ayaana
baajisay kulankii Baarlamaanka, sida ay in oo xaqiijiyeen Xildhibaano ka tirsan
Golaha Shacabka Soomaaliya.
Wali waxaa soconaya dadaalo ah in kulanka Baarlamaanka uu dhaco maalinka
Arbacada ah, ee fooda inagu soo haayso inakstoo Xildhibaanada mooshinka wada ay
dadaalo dheeraad ah ku bixinayaan sidii maalinkaasi mooshinka ay ugu
gudbin lahaayeen mudanayaasha Baarlamaanka.
Qaar ka mid ah Xildhibaan Baarlamaanka Soomaaliya ayaa sheegay in madaxweynaha
uusan wali la hadlin Xildhibaanada mooshinka wado waxayna intaasi ku dareen in
uusan sharci u lahayn madaxweyne Farmaajo in uu bur-buriyo mooshinka walina ay
ku adkeysanayaan in mooshinka la horgeeyo Baarlamaanka.
Madaxweyne Maxamed Cabdullaahi Farmaajo ayaa dhawaan baajiyay fadhigii
baarlamaanka ee la doonayay in looga doodo labo Ajando oo iska soo horjeeday,
kaasoo si weyn looga baqdin qabay inuu sababo gacan ka hadal dhax mara
Xildhibaanada.
Ilyaas Axmed Cilmi,
Hiiraan Online
Mogadishu, Somalia
