Uganda oo sheegtay in 22 ka tirsan Al-shabaab ku dileen weerarkii shalay ka dhacay Buula-Mareer
Isniin, April, 02, 2018 (HOL) – Saraakiisha ciidamada difaaca Uganda ayaa
sheegay in Ciidamadooda ay dileen 22 ka tirsan dagaalyahannada ururka
Al-Shabaab, kadib dagaal shalay barkhadii ka dhacay degaanka Buula Mareer ee
Gobolka Shabeellaha Hoose.
Waxaa ay sheegeen in labo ruux oo ismiidaamiyayaal ah gadiid ku soo
weerareen saldhig ay ku sugnaayeen ciidamadooda deegaanka Buula-Mareer ee
gobolka Shabeellaha Hoose.
Saraakiisha ciidamada Uganda ee ku sugan gudaha Soomaaliya ayaa sheegay in
weerarkaasi uu ahaa mid aad u xoogan, islamarkaana uu ahaa weerar ay kol horeba ciidamadooda ka war hayeen.
Wuxuu talisku sheegay in weerarka looga dilay Afar Askari, Lix kalena looga
dhaawacay, dhanka Shabaab ayuu tilmaamay in ay ka dileen ilaa 22 dagaalyahan,
kadib warbixin uu siiyay wakaaladda wararka ee Reuters.
“Siddeed ka mid ah gawaaridooda oo ay ku jiraan laba gaari oo walxaha qarxa
laga soo buuxiyay ayaa la bur buriyay, sidoo kale Qoryaha dagaalka ayaan kala
wereegnay, khasaaraha dhimasho ee aan wuxuu ahaa mid aad u xoogan.”
Ayaa lagu yiri qoraalka ay bixiyeen.
Soomaaliya waxaa ku sugan Ciidamo ka tirsan Midowga Afrika ee AMISOM, oo ka
kala socda dalalka Uganda, Burundi, Itoobiya, Kenya iyo Jabuuti, waxayna ciidamada
dowladda ka caawiyaan dagaalka ka dhanka ah ururka Al-shabaab.
C/raxmaan Diini,
Hiiraan Online
[email protected]