Faah faahin ku saabsan duqeymo lagu dilay saraakiil ka tirsanaa Al-shabaab oo ka dhacay Ceel-Buur
Isniin, April, 02, 2018 (HOL)-Warar dheeraad ah
ayaa ka soo baxay duqeyn culus oo lagu beegsaday saraakiil ka tirsan Ururka
Al-shabaab oo ku sugnaa deegaan hoostaga degmada Ceel-Buur ee gobolka
Galguduud.
Guddoomiyaha degmada CeelBuur Nuur Xassan
Guutaale oo la hadlay warbaahinta ayaa sheegay in duqeyntan oo ka dhacday
deegaan lagu magacaabay Dac lagu dilay saraakiil ka tirsan Al-shabaab iyo
shaqsiyaad Al-shabaab u qaabilsanaa sida uu hadalka u dhigay dhinaca guubaabada
iyo kicinta bulshada.
Diyaarad loo maleynayo in ay tahay nooca Drone-ka
ayaa bartilmaameesatay gaari ay la socdeen xubnaha ka tirsan Al-shabaab,
waxaana goobta ku dhintayay saraakiil iyo shaqsiyaad isugu jiray odayaal iyo
Abwaanno ka tirsanaa Al-shabaab.
Dadka dhintay ayaa sidoo kale lagu waramayaa in
ay ka mid aheyd haweeney ka tirsaneyd Al-shabaab.
Tirada guud ahaan xubnaha ka tiranaa Al-shabaab ee
ku dhintay duqeynta ayaa gaaraya 11, waana duqeyntii ugu horeysay ee nooceeda ah oo ka dhacda
Galgaduud.
Al-Shabaab oo dhinaccooda ka hadlay duqeynta ayaa
sheegay in lagu dilay saddex ruux oo rayid ah oo sida ay hadalka u dhigeen
isugu jiray odayaal iyo Abwaanno.
Gobolka Galgaduud ayaa ka mid ah deegaannada ay
ku xoogan yihiin Al-Shabaab, waxaana
degmada Ceelbuur lagu tilmaamaa in ay tahay saldhigyada Al-shabaab ugu weyn,
inkastoo sanadkii hore ay dib ula wareegeen, markii ciidamada Itoobiya isaga
baxeen.
C/raxmaan Diini,
Hiiraan Online
[email protected]
