Golaha Guurtidda Somaliland oo gardaro ku tilmaamay ciidamo cusub oo la soo dhoobay Xuduudda Somaliland
Axad, April, 01, 2018 (HOL)–Gudoomiyaha Golaha
Guurtidda Somaliland Saleebaan Maxamuud Aadan ayaa sheegay in ciidamo iyo
Tikniko ay ku jiraan Kaarayaal ay Soomaaliya soo dhoobtay xadka Somaliland,
waxaanu golaha ku wargaliyey inay taageeraan hadalka madaxweyne Muuse Biixi ee
ka dhanka ah Soomaaliya.
Golaha Guurtidda ayaa cod gacan taag ah ku meel
mariyey in la taageero difaaca qaranimadda Somaliland,isla markaana weerar
kasta oo kaga yimaadda Soomaaliya mar walba la saftaan madaxweynaha Somaliland.
Sidaas waxa uu ka sheegay kalfadhigii maanta oo
lagaga hadlayey arrimaha Soomaaliya iyo ciidamo la sheegay in la soo dhoobay
xadka Somaliland la wadaagto maamulka Puntland ee Soomaaliya.
Golaha guurtida waxa saaka soo xaadirey 46 mudane
oo ka mid ah 82 mudane ee golahaasi ka kooban yahay, waxaana cod gacan taag ah
ku taageereen hadaladda madaxweynuhu ku dhaliilayo Soomaaliya iyo difaaca
Somaliland, waxaana u codeeyey 44 mudane, hal mudanina wuu ka aamusay,
gudoomiyuhuna ma codeyn.
Gudoomiyaha Golaha Guurtidda Somaliland Saleebaan
Maxamuud Aadan oo ka hadlaya Soomaaliya waxa uu yidhi "Gardaradii
iyo daandaasigii Soomaaliya Somaliland ku heysay wali wuu socdaa gardaradaasina
waxaa aynu u arkeynaa inay horumarkeena iyo nolosheena uun ay wali hortaagan
yihiin, waayo waxaan horumarka dalkeena aheyn oo aynu qabanay ma jiro, wax lura
oo aynu iyaga ku heynaana ma jiro, intaas waynu u ducaynaa in ilaahay timaha u
kala furfuro.”
Waxa uu sheegay in Soomaaliya wali is haysato oo
baarlamaankii Soomaaliya laba garab u kala fadhiyo, waxaanu yidhi “ intaa weynu
u duceynaynaa maantana waynu u duceynaynaa in Illaahay timaha u kala furfuro
iyagiibaa qaybsan oo dawladii oo meela iyo Jawaari oo intii kale u talinayaa u
kala fadhiyaa fadhigii maanta ee ay sida dumarka timaha isku maran lahaayeen
waaka soo kala dhex galay madaxweynahoodu ee yidhi waar bal hala joojiyo,
sidooda ayay inala rabaan ee Illaahay inagama dhigo, sidii shalayba aan idhi
ciidamadii wali waa soo dhooban yihiin oo taangiyadii dagaalka keensade"
Gudoomiyaha Guurtidda ayaa sheegay in ciidamo
cusub oo gaadiid cusub wata la keenay xuduuda Somaliland, waxaanay ciidankaasi
iyo gaadiidkaasi cusuba ku eedeeyeen Soomaaliya oo farogalinaysa Somaliland.
Madaxweyne Muuse Biixi ayaa mudooyinkii u
dambeeyey shirar gaar gaar ah la lahaa shirgudoonka golaha Wakiiladda iyo
Guurtidda iyo waliba labadda xisbi mucaarad, wallow doorkii u dambeeyey aanu ka
soo xaadirin xisbiga WADDANI, waxaanu madaxweynuhu shirarkaasi uu la lahaa
shirgudoonka iyo xisbiyada mucaaradka ku wargalinayey arrimo uu sheegay inay ka
soo cusboonaadeen Soomaaliya oo uu ku eedeeyey inay farogalin ku hayso
Somaliland, taasina waxay keentay in shalay markii madaxweynuhu hadlayey uu ka
hadlayey arrimaha Soomaaliya isku hayaan.
Barkhad-ladiif M. Cumar, Hiiraan Online
[email protected]
Hargeysa, Somaliland.