Axad, September, 16, 2018 (HOL) –Orodyahanka reer Kenya ,Eliud Kipchoge ayaa taariikh cusub ka dhigay tartanka oradka adduunka, wuxuu ku guulaystay tartankii ka socday magaalada Berlin ee dalka Jarmalka.
Kipchoge ayaa ku ordday 2 saacadood, hal daqiiqo iyo 39 ilbiriqsi, waxaana oradka uu noqday mid aan looga horreyn, maaddaama uu jebiyay rikoorkii u yaallay tartankan.
Orodyahanka oo 33 jir ah waxaa loo diiwaangaliyay orodyahankii ugu horreeyay ee ku ordda wax ka yar 2 saacadood iyo 2 daqiiqo. Ninkan ayaa sidoo kale lagu tiriyaa inuu kamid yahay orodyahannada ugu wanaagsan dunidda ee wacadaraha dhigay.
Madaxwaynaha Kenya Uhuru Kenyatta ayaa u hambalyeeyay Eliud Kipchoge iyo kooxda kale ee tartanka ku matalaysay Kenya, isagoo yiri " Kenya way idin ku faraxsantahay."
Eliud Kipchoge ,waa markii saddexaad uu guul soo hoyiyo cayaarihii ka dhacay London , horrantii sannadkan wuxuu ahaa orodyahankii ku guulaystay oroddada Olimbikada.
Sannadkii 2003-dii Paul Tergat oo Kenya u dhashay ayaa isagana noqday orodyahankii ugu horreeyay ee ku ordda 2 saacadood iyo shan daqiiqo.
Sannadkii 2008-dii Haile Gebreselassie ayaa isagna ku ordday 2 saacadood iyo afar daqiiqo halka sannadkii 2104-kii uu ordyahan Kenya u dhashay uu isna qaatay 2 saacadood iyo 2 daqiiqo.
Iman Mohamed Jama, Hiiraan Online
[email protected]
