Talaado,, 01, May, 2018 (HOL) - Hooyo
iyo laba caruur ah oo ay dhashay ayuu xalay qaatay roob weyn oo ka da’ay
magaaladda Hargeysa, taas oo sababtay geeridda hal qof, halka mid kalena la
waayey nolol iyo geeri ka uu yahay.
Labaddii caruurta ahaa midna wuu geeriyooday kii
kalena illaa hadda waa la raadinayaa, halka hooyadii iyadoo koomo ku jirta laga
soo badbaadiyey daadkii.
Dhacdadan naxdinta leh ayaa ka dhacday xaafadda
Qudhac dheer ee koonfurta magaladda Hargeysa, waxaana xalay goobtaasi gaadhay
madaxweyne Muuse Biixi iyo xubno ka tirsan xukuuumadiisa, waxaanay u soo
tacsiyadeeyeen aabaha dhalay caruurtan.
Hooyadan daadku qaaday ayaa xambaarsanayd wiil
yar, sidoo kalena ay wehelinaysay gabadh yar oo ay dhashay, kuwaas gebi ahaanba
daadku la tegay, markii uu daadku soo gaadhay guri jiingad ahaa oo ay laba
maalmood ka hor uun kiraysteen kuna dhexyaalay dooxa, waxaana la soo helay
hooyadii oo hada koomo ku jirta iyo gabadhii yarayd oo mayd ah, halka wiilkii
yaraa ee hooyadu dhabarka ku sidayna la raadinayo sidaas waxa madaxweynaha uga
warbixiyey aabaha dhalay caruurtan daadku qaaday.
Aabaha qoyskan ka masuulka ah oo magaciisa
la yidhaahdo Axmed Qorene oo xaaladdan naxdinta leh ka waramaya waxa uu
yidhi “markay telefoonka igu soo dhufatay ee ay alla hoogayey tidhi een soo
cararay ee aan meel alle meel aan u maro waayey ee dooxii iga dheeraaday ayaan
anna dib isaga noqday, ka dib sandaqadii ayuu laba u kala gooyeen bixiyihii
dooxu, wax dhacday in xitaa ummaddii badbaadin kari wayday caruurtii” .
Aabbo Axmed Qorane oo hadalka sii wada ayaa yidhi
“Inan maydkiisa lama hayo, hooyadii iyo isaga inta uu wada qaatay daadkii ayuu
xanjeerkii ay ku xidhnayd ee ay ku xambaarsanayd ka furteen biyihii, iyadiina
koomay ku jirtaa oo waa la helay, innana imikaa maydkeedii ayaa la helay,
meeshuna waa halkaa dooxa badhtankiisa”.
Madaxweynaha Somaliland, Mudane Muuse Biixi Cabdi
ayaa tacsi u diray qoyskaa qadarka alle la kulmay, ayaa u duceeyey hooyada
koomada ku jirta, amrayna in gurmad qaran laga galo wiilka maqan sidii loo soo
heli lahaa raq iyo ruuxba, waxaanu yidhi madaxweynuhu “wixii qadar ilaahay
keeno waa qadar ilaahay uun, ka maqan geeri iyo nolol gurmad waynu wada geli,
wixii dhibaato iyo masiibo dhacdayna waa lagula wadaagi oo qarankaagiibaa kula
jooga, markuu gurmadku wada yimaado calool adayg uunbaa loo baahan yahay iyo
Samir, iyo tallo danbe oo wixii noocan oo kale ahna qaran ahaan looga wada
tashado haddii alle yidhaahdo, waan kaa tacsiyadaynayaa ka dhintay, ka maqana
waanu kula gurmanaynaa, masiibadana waanu kula qaybsanaynaa, dad badan ayey
caawa dhibaato gaadhay waana ka wada hawl-gelaynaa, ilaahayna waxa aan kaaga
baryeynaa in ka dhintayna halkiisa cawad khayr qaba ku geliyo, gabadhana Alle
ha caafiyo, adigana Alle ha kaa Samirsiiyo oo qalbiga ha ku adkeeyo, samirkana
badi dhamaanteenba waynu wada xukumanahay ”
Barkhad-ladiif M. Cumar, Hiiraan Online
[email protected]
Hargeysa, Somaliland.
