Khamiis ,Maarso, 29, 2018 (HOL) – Gabadha ku guuleysatay abaal marinta
caalamiga Nobel Peace Prize Malala Yousafzai ayaa dib ugu laabtay markii u
horeysay dalka Pakistan, tan iyo markii ay toogteen Kooxda Taliban lix sano ka
hor.
Malala oo hada ah 20 jir ayaa ah gabar u dooda xuquuqda aadanaha, koox ka
tirsan Taliban ayaa madaxa ka toogtay sanadkii 2012, xilligaasoo ay u
ololeynaysay waxbarashada gabdhaha.
Safarka Malala ee Islamabad ayaa ahaa mid qarsoodi ah, xaalad amni darteed,
iyadoo ammaanka si aad ah loo adkeeyay.
Waxaa wehliyay qoyskeeda oo kala soo degay garoonka diyaaradaha Benazir
Bhutto ee Islamabad.
Malala ayaa la filayaa inay la kulanto Ra’iisul Wasaaraha Pakistan Shahid
Khaqan Abbasi iyo mas’uuliyiin kale.
Lama xaqiijin inay booqan doonto iyo in kale magaalada ay ka soo jeedaan
qoyskeeda ee ku taal waqooyi galbeed Pakistan.
Malala Yousafzai ayaa sanadkii 2014 noqotay qofkii u horeeyay oo da’yar ah
oo ku guuleysata abaal marinta caalamiga Nabadda Nobel Peace Prize.
C/raxmaan Diini, Hiiraan Online
[email protected]