Arbaco, Maarso, 21, 2018 (HOL)–Guddoomiye
ku-xigeenka maamulka iyo maaliyada gobolka Shabeellaha hoose Cabdifitaax
Cabdulle ayaa sheegay in howlgal ay sameeyeen ciidamada lagu soo qabtay labo
saraakiil oo ka tirsanaa Al-shabaab.
Guddoomiye ku-xigeenka ayaa saraakiisha la soo
qabtay ku kala sheegay C/Kariin Abuu Xamsa oo Al-shabaab u qaabilsanaa maaliyadda
Gobolada Banaadir iyo Shabeellaha Hoose iyo Sheekh Muudey oo isna Al-shabaab u
qaabilsanaa Amniyaadka
“Sidoo kale guriga aan howlgalka ka sameyney waxaan ka soo qaadnay hub fara
badan oo ay ku jiraan kuwa gaadiidka dagaalka lagu xiro iyo qaraxyo ay
diyaarinayeen Saraakiisha la soo qabtay” ayuu yiri Cabdifitaax.
Wararku waxaa ay sheegayaan in intii lagu gudajiray howlgalka uu dhacay
dagaal kooban oo dhaxmarey ciidamada dowladda iyo dagaalamayaasha Al-shabaab.
Bilihii ugu danbeeyay gobolka Shabeellaha Hoose waxaa ka soconayay howlgalo
ay iska kaashaanayaan ciidamada dowladda iyo AMISOM oo lagu baahsanayo
Al-shabaab, wallow xoogaga Al-shabaab inta badan weeraro ku qadaan fariisimaha
labada ciidan.
C/raxmaan Diini, Hiiraan Online
[email protected]
