Jimco, Maarso, 16, 2018 (HOL) –Sida lagu daabacay
Wakaalada Wararka Reuters dowladda
Imaaraadka Carabta ayaa lagu wadaa in ay tababar siiso ciidamada Somaliland,
arintan oo qeyb ka ah sida uu sheegay madaxweyne Muuse Biixi heshiiska lagu dhisayo Saldhigga Milateri ee
Imaaraadka Carabta ka sameynayo Berbera.
Madaxweyne Muuse Biixi ayaa isaga oo ku sugan magalada Abu Dhabi u sheegay Reuters
in Imaaraadka Carabta ay tababari doonaan ciidamada Booliska iyo Militariga
Somaliland, isagoo rajo ka muujiyay in heshiiskan lagu soo gabagabeyn doono
labo bilood
Laakiin dhinaca Imaaraadka kama aysan hadal sheegashada Muuse Biixi, hase ahaatee waxaa ay Imaaraadka
Carabta ku adkeysanayaan in ay Boqolaal Milyan oo Dollar ku maalgelinayaan
sanadaha soo aaddan si ay isugu fidiso khad xeebeedka istiraatiijiga ah ee
Gacanka Cadmeed
Wasiirka Arrimaha Dibadda Somaliland Sacad Cali
Shire oo goobta wareysiga lagu qaadayay oo ahayd Abu Dhabi jooggay ayaa diiday
inuu sheego tirada ciidamada Imaaraatka ee saldhigan doona saldhiggaasi.
Muuse Biixi ayaa rajo ka muujiyay in maalgashiga Imaaraadka oo uu ku jiro
dhismaha garoon rayid ah oo cusub, dhismaha waddo isku xirta Berbera iyo
Ethiopia ay soo kordhin doonto fursado shaqo, isagoo xusay in shaqa la’aan
daran ay ka jirto deeggaannada uu ka arrimiyo.
Imaaraadka Carabta ayaa sanadihii ugu dambeeyay xoojiyay saameyntooda
siyaasadda arrimaha dibadda, iyagoo fara-gelin ku sameeyay Yemen, halkaas oo
ciidankooda ay ka barbar dagaalamayaan ciidamada dowladda Yemen ee dagaalka
kula jira Xuutiyiinta, sidoo kale waxaa ciidamo caalami ka joogaan dalalka
Kosovo iyo Afghanistan.
C/raxmaan Diini, Hiiraan Online
[email protected]
