Khamiis, Maarso, 15, 2018 (HOL) -- Maamulka degmada
Mandera ee gobolka Waqooyi Bari Kenya ayaa shalay bulshada Soomaalida ka
dalbaday in la wadagaan macluumaadka la xiriira dhinaca Amniga.
Guddoomiyaha degmada Mandera Kutswa Olaka,oo hogaaminayay wadahadallo
dhaxmaray labada dhinac ayaa sheegay in la joogo waqtigii si dhab ah looga wada
shaqeyn lahaa Amniga loona wadaagi lahaa macluumaadka,wuxuuna ka dalbaday
Soomaalida in ay laamaha amaanka u soo gudbiyeen haddii ay la kulmaan
macluumaad amniga wax u dhimaya.
Mr. Olaka ayaa sheegay in wali Qatar Amni ay ka dareemayaan Xuduuda ay la
wadaagaan Soomaaliya oo ah in ay ka soo gudbayaan kooxo xiriir la leh Ururka
Al-shabaab.
Wuxuuna kalsooni ka muujiyay in haddii ay mar wada shaqeyn buuxda ay
dhexmarto Shacabka Soomaaliyeed iyo Laamaha ammaanka Kenya ay ka guuleysan
karaan kooxda Al-Shabaab ee mararka qaar qalalaasaha ka geysata gudaha Kenya.
Ciidamada Ammaanka Kenya ayaa adkeeyay ammaanka deegaanada Gobolka Waqooyi Bari
Kenya si looga hortago weeraro ka yimaada Argagixisada Al-Shabaab.
C/raxmaan Diini,
Hiiraan Online
[email protected]
