Shirkii golaha Wasiiradda Somaliland oo maanta lagaga dooday amniga iyo xuduudaha bariga
Khamiis, June, 28. 2018 (HOL)- Shirkii
golaha wasiiradda Somaliland, ayaa maanta lagaga hadlay arrimaha amniga iyo
xuduudaha.
Shirkan golaha wasiiradda waxa shirgudoominayey
madaxweynaha Somaliland Muuse Biixi, waxana warbixin laga dhagaystay wasiirka
Gaashaandhiga oo ka warbixiyey xuduudaha bariga, waxaana la sheegay in difaaca
dhulka iyo sugidda xuduudaha ka go’an tahay.
“ Arrimihii shirkan lagaga hadlay waxa ka mid ahaa
xaaladda xuduudaha bariga ee dalka Somaliland iyo duullaanka lala dul-joogo
shacabka deegaannadaas oo muddooyinkii ugu dambeeyey ay weerarro kaga imanayeen
maamulka Soomaaliya, waxana shirka lagu muujiyey sida ay Somaliland u
danaynayso nabadda iyo deris-wanaagga.”ayuu yidhi afhayeenka madaxweynaha
Maxamuud Warsame Jaamac.
Waxaanu intaas ku daray “waxa uu shirku caddeeyey
inay Somaliland ka go’an tahay sugidda xuduudaheeda iyo difaaca dhulkeeda,
marnabana aanay weerar ku ahayn xuduudo dal kale, isla-markaana ay Somaliland
beesha caalamka iyo dalalka deriskaba u xaqiijinayso Muhiiimadda nabadda iyo
degenaanshaha.”
Barkhad-ladiif M. Cumar,
Hiiraan Online
[email protected]
Hargeysa, Somaliland.
