Arbaco, June, 27. 2018 (HOL) - Warar dheeraad ah ayaa ka soo baxaya Qarax
ciidamo ka tirsan militariga Soomaaliya lagula eegtay meel wax-yar u jirta
degmada Wanlaweyn ee gobolka Shabeellaha Hoose.
Guddoomiye ku-xigeenka gobolka Shabeellaha Hoose C/fataax Xaaji ayaa sheegay in Qarax oo lagu bartilmaameedsaday
ciidamo la socday gaari kuwa dagaalka ah ay ku geeriyoodeen saddex Askari oo
mid ka mid ah auu ahaa sarkaal ka tirsanaa ciidamada Danab kaa oo lagu magacaabi jiray Kabtan Maxamed Cabdi
Saciid.
Sidoo kale maamulka gobolka Shabeellaha Hoose ayaa waxa ay inoo sheegeen
qaraxan in ay ku dhaawacmeen ilaa Lix askari, kuwaasi oo xaaladooda caafimaad
lala tacaalayo.
“Meel Wanlaweyn ku dhaw ayaa qarax ka dhacay
Saddex Askari oo mid uu yahay Sarkaal ka tirsan ciidamada Danab oo dhawaan la
dalacsiiyay, Lix askari oo kalena way ku dhaawacmeen, waxaa socda baaritaano ay
wadaan ciidamada, waxaana lagu daba jiraa raggii falkan ka dambeeyay.” ayuu
yiri guddoomiye ku-xigeenka.
Dhawaan ayeey aheyd markii xoogag ka tirsan
Al-shabaab weerar dhabo gal ah ku qaadeen kolanyo ay la socdeen ciidamada AMISOM
oo marayay meel aan ka fogeyn degmada Afgooye, iyaga oo halkaa ku gubay qaar ka
mid ah gaadiidka ciidamada midowga Africa.
C/raxmaan Diini, Hiiraan
Online
[email protected]