Madaxweyne Farmaajo oo la kulmay wafdiggii ka socday dalka Jabuuti ee ka qeybgalay xuska 1da Luulyo
Isniin, July, 02, 2018 (HOL)– Madaxweynaha Soomaaliya
Maxamed Cabdullaahi Farmaajo ayaa Madaxtooyada Qaranka ku qaabilay wafdiga ka
socday Jamhuuriyadda Jabuuti oo Muqdisho uga qeyb galay
xuska maalinta xorriyadda Gobollada Koonfureed iyo israacii Waqooyi iyo Koonfur
ee 1-da Luuliyo.
Madaxweynaha ayaa tilmaamay xiriirka soo jireenka
ah ee ka dhaxeeya labada shacab ee walaalaha ah iyo himilooyinka wadajirka ah
ee ay xambaarasanyihiin, isagoona sheegay in farxad-wadaaga, iska warqabka,
dheef iyo dhib isla qeybsiga labada dal uu ku saleeysan yahay taariikhda qotoda
dheer ee ka dhaxeysa Soomaaliya iyo Jabuuti.
Madaxweynaha ayaa yiri; “Aniga oo ku hadlaya
magacayga iyo kan Jamhuuriyadda Federaalka Soomaaliya waxaan idinkaga
mahadcelinaynaa sida walaaltinimada leh ee aad noogala soo qeyb gasheen sanad
guurada 58aad ee ka soo wareegtay xorriyadda Gobollada Koonfureed iyo midwoga
labada gobol. Jabuuti waa dal aanu walaalo nahay, mar walbana garab iyo
taageero noo ah.”
Madaxweynaha ayaa uga mahadceliyay Madaxweynaha
Jabuuti Mudane Ismaaciil Cumar Geelle kaalintii uu ka geystay nabadeynta iyo
dowlad dhisidda Soomaaliya, wuxuuna qiray in shacabka Soomaaliyeed ay abaal
weyn uga hayaan hiilka walaaltinimo.
Wafdiga ka socday dalka Jabuuti ee la kulmay
Madaxweynaha ayaa waxaa kamid ahaa Wasiirrada Difaaca iyo Isgaarsiinta ee
Jamhuuriyadda aan walaalaha nahay ee Jabuuti, diblomaasiyiin ka tirsan
Safaaradda Jabuuti ee Muqdisho, fannaaniin ka tirsan Kooxda Xarbi ee Ciidamada
Qalabka sida ee dalka Jabuuti iyo saraakiil ciidan.
Kulanka waxaa kaloo joogay Guddoomiyaha Golaha Shacabka Mudane Maxamed Mursal Sheekh,
Ra’iisul Wasaaraha Xukuumadda Federaalka Mudane Xasan Cali Khayre, Guddoomiyaha
Gobolka Benaadir Mudane Cabdiraxmaan Cumar Cusmaan, xubno ka tirsan goleyaasha
Dowladda iyo saraakiil ka tirsan Ciidamada Qalabka sida.
C/raxmaan Diini, Hiiraan
Online
[email protected]
