Isniin, April, 09, 2018 (HOL) – Guddoomiyihii Golaha Shacabka Soomaaliya
Maxamed Sheekh Cusmaan Jawaari ayaa markii ugu horeysay si rasmi ah u
xaqiijiyay in uu iska casilay xilkii uu ka hayay Baarlamaanka kaddib khilaaf ku
dhawaad muddo bil ah ka dhax taagnaa Golaha.
“Waxaan idin xaqiijinayaa in aan iska
casilay xilka Afhayeenka Baarlamanka, waxaan u turay Aayaha dalka iyo inuusan
imaan khalalaase siyaasadeed oo muddo fog socda, kaasoo sababi kara in dalka uu
galo burbur.” ayuu yiri Gudoomiye Jawaari oo la hadlayey idaacada BBC-da.
Prof Jawaari ayaa sheegay in go’aankan uu qaatay si uu burbur uga badbaadiyo
Baarlamanka iyo dowlada.
Wuxuu sheegay in kulanka Arbacada dhici doono uu si rasmi ah xildhibaannada
uga hor sheegi doono istaqlaadadiisa iyo in uu xilka isaga degay.
Laakiin guddoomiyuhu ma uusan bixin faah faahin intaa dhaafsiisan oo la
xiriirta sababaha ku kalifay in uu ku dhawaad bil uu soo jiitamay is
mari-waagan in uu waqtigan ku soo beego is casilaadiisa.
Guddoomiye ku-xigeenka koowaad ee baarlamaanka Cabdiwali Muudey ayaa
baarlamanka ka sheegay inuu is casilay Jawaari, sidaasi darteedna waxaa la joojiyay
codkii kalsoonida ee loo qaadi lahaa guddoomiyaha.
Iscasilaadan ayaa timid kaddib kulamo is daba joog ah oo tan iyo shalay u
socday isaga iyo madaxweynaha dowladda Soomaaliya, taasoo ugu danbeyntii
keentay in uu aqbalo tallaabadan uu xilka uga tagay.