Isniin, April, 09, 2018 (HOL) – Xili Kulankii la wada sugayay ee golaha Baarlamaanka
Soomaaliya uu baaqday maanta islamarkaana gudoomiye Jawaari uu Iscasilay
ayaa waxaa dib loo furay guud ahaan wadooyinka magaalada Muqdisho, oo xalay
ilaa saakay xernaa.
Ciidamada ammaanka Dowladda Federaalka ayaa xalay waqti
dambe xiray inta badan wadooyinka Magaalada Muqdisho, maadaama la filayay in
maanta uu dhaco kulanka Baarlamaanka oo codka kalsoonida loogu qaadi lahaa gudoomiye
Jawaari, balse inta uusan kulanka furmin ayaa waxaa soo baxay war sheegayo in
uu is casilay gudoomiye Jawaari.
Kaddib markii uu warkaasi soo baxay
ayaa durbo waxaa bilaabatay in ciidamada laga qaaday wadooyinkii ay xireen,
taasoo shacab badan oo xirnaashaha dhib ku qabay ay soo dhaweeyeen waxaana hada
dib u soo laabtay isu socodka gaadiidka dadweynaha.
Si kastaba shacabka gobolka Banaadir ayaa dhibaato Xoogan ku qabay Xaaladaha
Cakiran ee Siyaasada dalka taasoo 14kii bishii March u soo bilaabatay ka dib
mooshinkii ka dhanka ahaa Gudoomiye Jawaari iyadoona ay u sii dheereed
xernaashaha caadada ka noqotay wadooyinka Magaalada Muqdisho wallow ay ilaa
hada jirin cid ka hadashay warkan Iscasilaada gudoomiye Jawaari.
Ilyaas Axmed Cilmi, Hiiraan Online
Mogadishu, Somalia
