Isniin,
April, 09, 2018 (HOL) – Waxaa malinta
Sabtida ee taariikhdu aheyd April 7, 2018, lagu qabtay Iskuulka Kipling Collegiate Institute ee ku
yaalla magaalada Toronto shir balaaran oo ay kasoo qayb galeen dad ku dhow 600
qof ee jaaliyadda Soomaaliyeed ee degan magaalada Toronto iyo nawaaxigeeda.
Shirkaas oo ay soo abaabuleen guddi ka kooban
aqoonyahanno, culumaa’uddiin, waalidiin, iyo dhalinyaro ka tirsan jaaliyadda
Soomaaliyeed ee Magaalada Toronto. Guddigaas oo la magac baxay “Somali Canadian Forum” ayaa shirka u
agaasimay si hufnaan sare ah waxayna dadka kasoo qayb galay u riyaaqeen habsamida
uu shirka u socday. Wuxuu ahaa shir wax ku ool badan ayna kasoo qayb galeen
madaxda kala ah:
- Michael Coteau-
Minister of Children & Youth Services (Ontario)
- Doug Ford- Leader
of the PC Party
- Peter Tabuns- MPP
Toronto-Danforth.
- John Tory - Mayor
of Toronto
- Yvan Baker - MPP
Etobicoke-Centre.
- Shafiq Qaadri-
MPP Etobicoke-North.
- Michael Ford -
Councillor Etobicoke- North Ward 2
- Vincent Crisanti
-Councillor Etobicoke - North Ward 1
- Abdi Hagi Yusuf - Canadian Union of
Postal Workers- Secretary-Treasurer.
Somali Canadian Forum oo ay ka wada
tirsan yihiin culumaa’uddin, aqoonyahano, iyo dhalinyaro ayaa ah madal ama urur
ka caagan in ay qaataan wax lacag ama deeq ka timaadda
dowladda Canada iyo ururada la halmaala. Ulajeedada shirka laga lahaa ayaa
ahayd laba qaybood. Qaybta koowaad oo Af-Soomaali barnaamijku uu ku socdey
waxay guddiga la wadaageen jaaliyadda hawsha ay soo qabteen, sababta loo
aasaasay guddiga, iyo waxa ay ku tala jiraan in ay ka qabtaan sidii loo joojin
lahaa muusiibada ka heysta dilka dhalinyarada Soomaali. Qaybtaan waxaa ka
hadlay culumaa’uddin iyo aqoonyahanno. Waxaa hadal taabtay dhinacya badan ku
saabsan badbaadada dhalinta Soomaaliyeed soo jeediyey Sh. Cadulraxmaan Bashir.
Qaybta labaad ee shirku oo
barnaamijku ahaa af-Ingiriis waxey dhalinyaro ka tirsan jaaliyadda usoo
bandigeen “powerpoint presentation” oo guddigaan soo diiyaariyey oo ay
ugu sharaxayaan madaxda dowladda gobolka, xisbiyada mucaaradka ee gobolka,
dowladda hoose, iyo dadweynaha Soomaaliyeed asbaabta ama daruufaha keena
dhibkaan iyo musiibadaan, tirakoob ka hadleysa tirada toogashada iyo dilka ka
dhacay magaalada sanooyinka lasoo dhaafey, iyo cilmibaaris ay soo sameeyeen
sidii arrintaan wax looga qaban lahaa. Waxa ay aad diiradda u saareen in loo
baahan yahan in iskaashi uu dhex maro jaalidda Soomaaliyeed, ciidamada
Booliska, wasaaradaha kala duwan ee gobolka, iyo hay’adaha dowliga oo idil.
Waxay kaloo si cad u tilmaameen in si wadajir ah musiibadaan looga hortago.
Waxayna guddiga “Somali Canadian Forum” ay madaxda joogtey hordhigeen afar
“recommendations” ama talo soo jeedin ku saabsan sidii dilalkaan loo joogin
lahaa dhalinyarada yaryarna looga celin lahaa in ay ku biiraan kooxa hubeysan.
Duqa magaalada Toronto, Mayor John
Tory, ayaa ugu horeeyey qof ka ajiiba talo soo jeedintaas isagoo balan qaadey
in intaas iyo kabadanba uu diyaar u yahay in uu qabto. Waxaa ku xigey wasiirka
dhalinyarada iyo adeega caruurta oo isagana ogolaaday in ay dowladda gobolka ay
fuliso talo jeedintaas kuna tilmaamay in dhibaatada jirta aysan ka marneyn
midab takoorka weli ka jira gobolka.
Waxaa ku xigey madaxa xisbiga
mucaaradka ee PC, Doug Ford, oo ku tilmaamay jaaliyadda Soomaali ee gobolka
Ontario dad firfircoon isagana uu u heysto in ay yihiin reerkiisa oo kale.
Wuxuuna balan qaadey in uu talooyinkaas uu fulin doona. Ugu dambeyntii waxaa ka
hadley arrintaan xildhibaan Peter Tabuns oo ka tirsan xisbiga gobolka ee
mucaaradka ee NDP, oo ku nuuxnuux saday sida ay xisbigiisa u garab taagan
yihiin jaaliyadda ayna ku dhaqmidoonaan talooyinka loo soo jeediyey.
