Isniin, April, 09, 2018 (HOL ) –Guddi xildhibaanno ah dhawaan uu guddoomiye Jawaari uu
saaray xal u helida khilaafka siyaasadeed ee ka Oogan Baarlamaanka Soomaaliya
ayaa eedeyn kulul u jeediyay madaxda ugu sareysa Qaranka, gaar ahaan
madaxweynaha dowladda Soomaaliya Maxamed Cabdullaahi Farmaajo.
Guddigan oo ka koobnaa 7 xubnood kana tirsan
xildhibaannada ka soo horjeeda mooshinka, ayaa ayaa sheegay in madaxweynuhu
iska dhaga-tiray dhamaan tallooyinkii ay u soo jeediyeen si oo loo dhameeyo
xiisada ka dhax jirta Baarlamaanka.
Xildhibaan Xasan Cabdi Ismaaciil (Xasan Yare)
ayaa sheegay in Madaxweynaha ay
hordhigeen labo qodob oo kala ahaa in lagu dhaqmo dastuurka, islamarkaana
sanduuq lagu kala baxo, iyadoo goob joogayaal ay joogaan iyo in wada hadal
siyasadeed la gaaro.
Xildhibaan Xassan Yare ayaa sheegay in
madaxweynaha iyo guddoomiye Jawaari oo wada fadhiya xildhibaannada loo diray
fariimo loogu baaqayo in ay ka soo qeybgallaan kulan Berri ka dhacay xarunta
Golaha Shacabka, taasoo uu ku tilmaamay arin nasiib darro ah.
Xildhibaanka ayaa ku eedeeyay xukuumadda in ay ka
dhigtay golaha Baarlamaanka xarun dagaal oo saacad walba loo sii daabulayo sida
uu hadalka u dhigay ciidamadii loogu talagalay difaaca dalka.
“Haddii uu madaxweynuhu fowdo aqbalo waxaa laga
yaabaa in wax-yaabo badan ay dhacaan, berri isaga ayaa gacmaha iyo lugaha loo
taagayaa, madaxweyne sii ma sii ahaan karo hala socdo”ayuu yiri Xildhibaan
Xasan Yare.
Khilaafka ayaa hadda u muuqda mid faraha ka
baxay, islamarkaana ay u muuqato in xildhibaannada leysku fasaxay ishana lagu
wada hayo halka ay wax ku danbeeyaan.
C/raxmaan Diini,
Hiiraan Online
[email protected]