Sabti, April, 07, 2018 (HOL) – Guddoomiyaha
Golaha Shacabka Prof Maxamed Sheekh Cusmaan Jawaari ayaa kulan la qaatay danjiraha
dowladda Turkiga u fadhiya Soomaaliya Olgan Bekar oo ay ka wada hadleen
xoojinta xiriirka labada wadan ee Soomaaliya iyo Turkiga iyo sidii dowladda u
sii dardar gelin laheyd taageerada ay baarlamaanka Soomaaliya siiso.
Sidoo kale kulanka waxaa ku sugnaa mas’uuliyiinta
hay’adda TIKA oo ah hay’ad dib u dhiska ku sameyneysa Xarunta ku meel gaarka
ah ee Golaha Shacabka.
Waxay aheyd 10-kii bishii Maarso ee sanadkan
markii heshiis ku saabsan dhismaha xarunta Golaha Shacabka ay kala
saxiixdeen guddoomiyaha Jawaari iyo Safiirka Turkiga ee Soomaaliya, waxaana dhismaha
xarunta uu socon doonaa muddo hal sano ka yar.
Danjiraha Dowladda Turkiga u fadhiya Soomaaliya Olgan Bekar ayaa
sheegay in dowladda Turkiga ay mar walba diyaar u tahay in ay sii xoojiso
taageerada ay siineyso Soomaaliya.
Gudoomiyaha Golaha Sacabka Maxamed Sheekh
Cismaan Jawaari ayaa uga mahad celiyay dowlada turkiga iyo hay’adda TIKA sida
ay mar walba u garab taaganyihiin golaha shacabka gaar ahaan dhismaha hada ay
ku sameynayaan xarunta golaha shacabka.
Ilyaas Axmed Cilmi, Hiiraan Online
Mogadishu, Somalia