Wararkii ugu danbeeyay xiisada mooshinka ka dhanka ah guddoomiyaha Golaha Shacabka
Jimco, April, 06, 2018 (HOL) – Xildhibaanno ka tirsan Golaha Shacabka ayaa
waxba kama jiraan ku tilmaamay wararka saacadihii ugu danbeeyay soo baxay oo
sheegaya in guddoomiyaha Baarlamaanka Soomaaliya Prof Maxamed Cismaan Jawaari
qorsheynayo in uu is casilo.
Haddaba waxaa arintaa ku gacan seyray xildhibaanno ka tirsan Golaha Shacabka
oo sheegay in marnaba guddoomiyaha qorshihiisu aheyn in uu is casilo, laakiin
aamisan yahay in sharciga lagu kalo baxo.
Sidoo kale xafiiska guddoomiyaha Baarlamaanka ayaa laga beeniyay warar lagu baahiyay baraha bulshada oo sheegaya
in guddoomiye Jawaari is casilayo.
Wali waxaa taagan xiisada siyaasadeed ee ka
abuurantay mooshinka laga keenay guddoomiyaha Golaha Shacabka,
iyadoo Arbacadii aynu soo dhaafnay uu fashilmay kulan la filayay in ay yeeshaan
xildhibaannada oo looga doodi lahaa mooshinka.
Taliska ciidamada militariga Soomaaliya ayaa xabsiga
dhigay qaar ka mid ah ciidamada guddoomiye Jawaari oo ay ku eedeeyeen in ay ku
lug lahaayeen shaqaaqadii Baarlamaanka iyo iska hortaagii lagu sameeyay kulanka
xildhibaannada Golaha Shacabka Arbacadii ina dhaaftay.
Lama oga halka looga dhaqaaqayo is mari-waaga wali taagan oo aad moodo in uu gaaray heerkiisii ugu sareeyay siweynna uga kala qeybsameen xildhibaannada Golaha Shacabka.
C/raxmaan Diini,
Hiiraan Online
[email protected]
