Arbaco, April, 04, 2018 (HOL)-Magaalada Muqdisho ayaa ku sugan saakay
marxalad ka duwan sidii ay aheyd labadii maalmood ee la soo dhaafay waxaana la
oran karaa Muqdisho waxaa ay ku waabariistay dareen siyaasadeed iyo shaki
bulshadu ka qabaan kulanka xildhibaannada Golaha Shacabka oo waqtigan soconaya.
Waa arin ku cusub kulamadii ay
horay u yeelan jiraan xildhibaannada Baarlamaanka in kaddib Salaada Subax ay
xildhibaanno sii xaadiraan xarunta Golaha Shacabka taasoo sawir guud ka
bixineysa sida kulanku u yahay mid mid aan caadi aheyn oo xasaasi ah.
Lama oga in fadhiga maanta uu
tagi doono guddoomiye Prof Maxamed Cismaan Jawaari oo xildhibaannada qaar
qabaan in maanta laga doodayo mooshinka ka dhanka ah, laakiin waxaa hubaal ah
in uu halkaa tagi doono guddoomiye ku-xigeenka koowaad ee Golaha Cabdiwali
Muudeey oo la filayo in uu kulanka shir guddoomiyo.
Ciidamo siweyn u hubeysan ayaa la
geeyay dhamaanba jidadka gala xarunta Golaha Shacabka kuwaa oo ilaalinaya
Amaanka guud ahaan xarunta iyo xildhibaannada halkaa ku shiran.
Ammaanka Xarunta Madaxtooyada oo aan siweyn uga fogeyn xaruntaa Golaha
Shacabka ayaa sidoo kale Amniga aad loo
adkeeyay, waxaa waddooyinka soo gala xarunta lagu arkayay ciidamo fara badan.
Ilaa iyo hadda xaaladu waa ay degan tahay, laakiin waxaa isha lagu wada
hayaa oo bulshadu ka ka war sugayaan sida xaaladu isku badali doonto marka uu
kulanku furmo.
C/raxmaan Diini,
Hiiraan Online
[email protected]
