Madax dhaqameed ka mid ahaa golaha Guurtida Somaliland oo muddo laga hakiyey in uu golaha yimaado
Isniin, April, 23, 2018 (HOL) - Suldaan Ismaaciil
Suldaan Cabdiraxmaan oo ka mid ah xildhibaanadda golaha Guurtida ayaa laga
joojiyey inuu golaha yimaado ka dib markii uu ka qaybgallay caleemo saar
xafladii loo qabtay beel daajiye ka dhacay deegaanadda Puntland.
Suldaan Ismaaciil ayaa ka mid ahaa afar madax
dhaqameed oo reer Somaliland oo ka qaybgallay caleemo saarka xaflad lagu
caleemo saarayey beel daajiyo reer Puntland ah, haseyeeshee waxa uu isagu kaga
duwan yahay madax dhaqameedkii kale wuxu ahaa xildhibaanadda golaha Guurtidda,
wallow isaga lagu casuumay madax dhaqameed ahaan.
Gudoomiye ku xigeenka golaha Guurtidda Siciid
Jaamac Cali ayaa warbaahinta u sheegay in inta go’aan laga gaadhayo laga
joojiyey inuu ka qaybgalo kalfadhiyada golaha.
“way jirtaa xildhibaan ismaaciil oo haddana
madax dhaqameed ahi inuu deegaanadda Puntland kaga qayb galay beel daajiye lagu
caleemo saarayay hadaladii meeshaa qaybo ka mid ahi madax dhaqameedkeenu ka
jeediyeen ayaa keentay woxoogaa yar oo xasaasiyad ah,markaas anaga waxa naga
khuseeyay odayaashii meesha tagay xildhibaankaas, shirguddoonkuna waxa ay
go’aamiyeen in go’aan laga gaadhayo in golaha dibada ka joogo wixii kasoo
baxana dib ayaanu idiinka soo sheegi doonaa.”ayuu yidhi Siciid Jaamac gudoomiye
ku xigeenka Guurtidda
“suldaanka odhan mayno waa la ciqaabayaa oo
ciqaab malaha laakiin dibada ayuu ka joogayaa golaha guurtidda in muddo
ah.”ayuu hadalkiisa raaciyey.
Suldaan Ismaaciil in la xidho waxa ka
badbaadiyey xasaanadda xildhibaanimo ee uu huwan yahay, isla markaana wararku
waxay sheegayaan in la doonayo in laga qaadayo xasaanadda xildhibaanimo
maadaama oo isagoo xildhibaanna ka qaybgallay xaflad ka dhacaysay deegaano
Puntland, wallow isagu aanu hadalo siyaasadeed madasha ka jeedin.
Xildhibaan Ismaaciil ayaa isaguna geestiisa ka
wadda dhaqdhaqaaq uu xildhibaanimadisii ku sii haysanayo, waxanu maanta
la arkayey isagoo shir ducoodyo la lahaa madax dhaqameed kale si aan xasaanadda
looga qaadin.
Barkhad-ladiif M. Cumar, Hiiraan Online
[email protected]
Hargeysa, Somaliland.