Axad, April, 22, 2018 (HOL) – Wuxuu ahaa muuqaal qurux
badna oo dhalinyaro Soomaaliyeed ay ku
soo bandhigeen aqoontooda la xiriirta Tkinolojiyada kaddib Bandhigga (Usbuuca Injineerka) oo ka furmay magaalada Muqdisho gaar ahaan xarunta
Kambaska Dr. Shahiid ee Jaamacadda Benadir oo ku yaalla deegaanka Garasbaaley
ee duleedka magaalada Muqdisho.
Waxaa bandhigan soo agaasimay
Kuliyadda handasada iyo Tiknolojiyada oo ka mid ah 12-ka kuliyadood ee ay ka
kooban tahay Jaamacadda Banaadir, iyadoo barnaamijkan oo ahaa mid aad xiiso
badan ay ka qeyb qaateen qaar ka mid ah ardayda kuliyaddan oo soo bandhigay
agabyo kala duwan oo hal abuurkooda ay ku sameeyeen, iyagoo kaashanaya aqoontii
ay barteen.
Mas’uuliyiin kala duwan oo ka
tirsan Jaamacadda Benadir, aqoonyahanno, qaar ka mid ah ardayda wax ka barata
dugsiyada sare ee gobolka Banaadir iyo marti sharaf kale ayaa ka qeyb galay munaasabadii
furitaanka Usbuuca Injineerka.
Hormuudka kuliyadda Handasada
iyo Tiknolojiyada ee Jaamacadda Benadir Ing. C/risaaq Cali Caseyr ayaa sheegay
in muhimada iyo ujeedada ay ka leeyihiin barnaamijkan ay tahay sidii ardayda ay
u soo bandhigi lahayeen hal abuurkooda aqooneed, isla markaana bulshada loo
dareensiin lahaa waxa ay tahay Maadada Ingineerinka oo uu xusay in dadka
badankood aysan aad u fahamsaneyn aqoonta ay ka turjumeyso iyo baahida loo
qabo.
“Barnaamijkan Usbuuca Injineerka
waxaa uu ka dhashay aragtida guud ee masuuliyiinta Jaamacada Banaadir, waxaana
sanadkii hore la qorsheeyey in Jaamacaddu ay dib u habeyn isku sameyso,
lana bilaabo in ardayda la siiyo fursado ay ku soo bandhigaan hal abuurkooda,
haddaba qeybta injineerinka iyadoo ka duuleysa aragtidaas ayey soo
qaban-qaabisay bandhigan oo aan rajaynayo inuu sanadle noqdo” ayuu yiri Ing.
Caseyr oo u mahad celiyey Maamulka Jaamacadda Benadir iyo dhamaan intii gacanta
ka geysatay qaban-qaabada barnaamijkan oo uu xusay in todobaadka uu socdo
maalin walba lagu casuumi doono ardayda wax ka barata dugsiyada sare ee dalka
si ay fikrad guud uga qaataan Ingineerinka.
Guddoomiyaha Jaamacada Benadir
Dr. C/risaaq Axmed Dalmar oo gebagebadii Munaasabadaas ka hadlay ayaa sheegay inuu
ku faraxsan yahay ka qeybgalka Usbuuca Injineerka ee ay soo agaasintay
Kuliyadda handasada iyo Tiknolojiyada ee Jaamacada Benadir, isagoo dhinaca kale
ka waramay Muhimada injineerinka iyo faaiidooyinka laga dhaxlo barashadiisa.
“Handasada ama Injineerinka
waa aabaha cilmiga kale oo dhan, dagaaladii sokeeye ka dibna kuliyaddan waa tii
ugu horeysay nooceeda ah ee dalka laga furo, waxaa ka qelin jebinaya sanadkan
dufcadii 9aad, shan dufcadood oo kalena waxbarashada ayaa u socota, injineeradii
horey nooga qelin jebiyey wadanka oo dhan ayey ka shaqeeyaan dhismayaal waaweyn
ayey qaarkood hirgeliyeen, qaar kalena Jaamacaddo ku yaalla adduunka ayey
waxbarasho kale u doonteen” ayuu yiri gudoomiye Dalmar oo bogaadiyey ardayda
barnaamijkan ku soo bandhigay hal abuurkooda aqooneed, isagoo kula dardaarmay
iney sii xoojiyaan dedaalkooda.
Waxaa sidoo kale, munaasabadan
hadalo isugu jiray soo dhoweyn iyo dhiirigelin ka jeediyey xubno kala duwan oo
ay ka mid ahaayeen hormuudka kuliyadda Geo-Science ee Jaamacadda Benadir Ing.
C/qaadir Abiikar, Guddoomiyaha Midowga ardayda kuliyadda handasada iyo
Tiknolojiyada Ing. Cali C/qaadir Cali, Guddoomiyaha Midowga ardayda Jaamacada
Benadir Ing. C/salaan Yuusuf Cabdulle iyo xubno kale.
Wax-yaabaha xiisaha leh ee
ardaydu ku soo bandhigeen barnaamijka Usbuuca Injineerka ayaa waxaa ka mid
ahaa, Bridgyo ama buundooyin loogu talo in lagu fududeeyo jidadka mashquulka
badan sida isgoyska Zoope, waxaa kale oo ardaydu soo bandhigeen robot soconaya
oo aan dhaafeynin halka loo calaamadeeyey, Sollar system loo isticmaalayo
waraabka beeraha, si loo baajiyo shidaalka fara badan ee Matoorada, Disegn-ka
taaladii Xaawo Taako oo dhameystiran, qalab ka digaya fatahaada webiyada
iyo daadadka iyo waxyaabo kale oo aad xiise badan.
Munaasabadan ama furitaanka
Bandhiga ayaa ka mara-kacaya marka dhinac laga eego hormarka ballaaran oo ay ku
talaabsanayaan dayarta Soomaaliyeed ee wax ku barata gudaha dalka Soomaaliya oo
la yimid hindse aqoonneed oo mustaqbalka wax weyn soo kordhin kara.
C/raxmaan Diini, Hiiraan Online
[email protected]
