Sabti, April, 21, 2018 (HOL) –Wasiirka arrimaha
dibeda Somaliland Sacad Cali Shire oo ka jawaabayay hadalkii dhawaan ka soo
yeeray Wasiiru-dowlaha arrimaha dibeda Imaaraadka Carabta ayaa sheegay in ay
dhab tahay in Imaaraadku uusan si dhab ah u Ictiraafsaneyn jirintaanka Somaliand.
‘’Waa dhab Imaaraadku si rasmi ah uma aqoosana
jiritaanka Somaliland, Safaaradna kuma laha, Qunsulna kuma laha, laakiin
xaqiiqdu waxaa ay tahay Somaliland wadan jira oo jiritaankiisu la aqoonsan
yahay cid faro badan oo dan ka lihina ay heshiis kula gashay’’ ayuu yiri
Wasiirka arrimaha dibeda Somaliland.
Waxaa uu meesha ka saaray wasiirka eedeyn uga
timid guddoomiyaha Xisbiga WADDANI Cabdiraxmaan Cirro oo ku eedeeyay xukuumadda
uu hogaamiyo madaxweyne Muuse Biixi Cabdi Qiyaanno Qaran.
‘’Ma jirto Qiyaanno Qaran oo aynu galnay iyo Shacab la
qiyaameeyay intaba, heshiiskan markii la
galayayna Soomaaliya daraf kama aysan aheyn’’ ayuu hadalkiisa sii raaciyay
Wasiirka.
Wasiirka ayaa ku adkeystay in heshiiskii ay
wadagaleen iyaga iyo shirkadda DP World uu ahaa mid sax ah oo hergalay, isaga
oo intaa ku daray in la horgeeyay heshiiskaa oo tafaftirada golaha Wakiilada
Somaliland sidaana ku aqbaleen.
Hadalka Wasiir Sacad Cali Shire ayaa imanaya
xilli Imaaraadku sheegeen heshiiska dekedda Berbera ay la galleen dowladdiihii
hore ee Soomaaliya sidoo kalana aqoosan yihiin midnimada umadda Soomaaliyeed.
C/raxmaan Diini,
Hiiraan Online
[email protected]