Isniin, April, 02, 2018 (HOL) – Wararka
naga soo gaaraya degmada Buula-burte ee gobolka Hiiraan ayaa sheegaya in deegan
qiyaastii 7km dhinac galbeed uga beegan ku dhinteen ugu yaraan 10 ruux kaddib
markii ay ku qarxday miino waddada dhinaceeda lagu aasay.
Dadka qarax ku dhintay ayaa isugu
jira, Hooyo iyo Afar caruur ah oo ay dhashay Aabe iyo macalin Dugsi Qur’aan
sida ay qaxiijiyeen dadka deegaanka uu qaraxani ka dhacay.
Dadka ayaa la sheegay in ay ku
soo socdeen degmada Buula-burte oo ay adeeg caafimaad u doonanayeen sida ay
sheegeen mas’uuliyiin ka tirsan degmada.
Guddoomiyaha Buula-Burte Cabdi
Daahir Guure, ayaa warfidiyeenka u sheegay in nuuca miinada ay ahayd kuwa
Taangiyada lagula dagaalamo, waxaana loogu talagay, sida uu sheegay, in lala
beegsado gaadiidka ciidamada oo waddada isticmaala.
Waa tiradii ugu badneyd oo dad ah
oo mar kaliya ku geeriyooda qarax miino oo ka dhacay deegaan hoos yimaada
degmada Buula-burte.
C/raxmaan Diini,
Hiiraan Online
[email protected]
