Khamiis,, April, 19 , 2018
(HOL) - Hay’adda u dooda xuquuqda aadanaha ee Human Rights Watch ayaa waxaa ay soo
saartay qoraal ay kaga hadashay tacadiga Qaxootiga Magangelyo-doonka ah loogu geysto dalka Yemen.
Human Rights Watch waxaa si
gaar ah u xustay in ciiddanka Yemen oo ay Dowladda Imaaraadka ay tababartay
xadgudub baahsan oo ay u geystaan Qaxootiga Soomalida iyo kuwa Afrikaanka
ah ee ku nool magaalladda Cadan ee dalkaasi.
Human Rights Watch (HRW) waxaa ay kaloo sheegtay inay dowladda Yemen diidan tahay in ay muhiimad siiyaan Qaxootiga
magangelyo-doonka ah, isla markaana ay si khaasab ah uga masaafuriyaan dekedda
Cadaan.
Xog ay kasoo aruurisay Qaar ka
mid ah Qaxootiga Yeman jooga waxay u sheegeen Hay’adda Human Rights Watch inay
Ilaaladda Yemeniyiinta jir-dil iyo Kufsi u geystaan Qaxootiga, iyagoona ugu
hanjabaya inay dili doonaan ama ka masaafurin doonaan dalka Yemen.
Agaasimaha Xuquuqda Qaxootiga
ee Human Rights Watch, Bill Frelick ayaa sheegay in Ilaaladda Xarunta Qaxootiga
lagu hayo ee magaalladda Cadan in ay jir-dilaan ragga, kuna xad-gudbaan Haweenka
iyo Wiilasha, waa sida uu haadalka u dhigay.
Waxaa uu intaasi ku daray in
boqolaal Qaxooti la masaafuriyey, iyagoo la saaray doonyo aad loo buux
dhaafiyey.
Warbixinta Human Right Watch
waxaa kaloo loo sheegay in xarunta lagu fara-xumeeyo Qaxootiga oo ku taallo
deegaanadda ay dowladda Yemen ka taliso, hayeeshe ciiddamo ay tababartay
Imaaraadka Carabta gacanta ku hayaan Xaruntaasi.
Warbixinta waxaa lagu muujiyey
in ay dowladda Yemen iyo Ciiddanka Imaaraadka ka gaabsadeen in ay ka hadlaan
Tacadiyadda Qaxootigaas loogu geysto xarunta Qaxootiga lagu hayo ee magaalladda
Cadan.
C/raxmaan Diini,
Hiiraan Online
[email protected]