Taliska Militariga Soomaaliya oo beeniyay in la boobay dugsigii tababarka ciidamada ee Jen Gordan
Talaado, April, 17, 2018 (HOL) - Taliska ciidamada
militariga dowladda Soomaaliya ayaa waxba kama jiraan ku tilmaamay warar
saacadihii ugu danbeeyay soo baxayay oo sheegaya in ciidamo ka tirsan dowladda
Soomaaliya boobeen agabkii yaala dugsiga Jen Gordan oo ay maamulaan
Imaaaraadku.
Wararka lagu baahiyay qaar ka mid ah warbaahinta ayaa
lagu sheegay in ciidamo ka tirsan dowladda Soomaaliya dhac iyo boob ka geysteen
dugsiga tababarka ciidamada Jen Gordan oo ay baneeyeen saraakiishii Imaaaraadka
ee ku tababari jiray ciidamada militariga Soomaaliya.
Taliyaha hogaanka siyaasada iyo wacyi-gelinta ee
ciidamada xooga Gaashaanle sare Cabdixamiid Sheekh Cali Xayda oo warbaahinta la
hadlay ayaa sheegay in aysan jirin eedeeyntaasi, wuxuuna tilmaamay in la
baahiyay warar aan sax aheen.
Sarkaal lagu magacaabo Cabdullaahi Cumar Cali oo ka mid ah saraakiisha
Milatariga Soomaaliya ee ku sugan xerada Tababarka Dowladda Imaaraadka Ccarabta
ay ku leedahay magaalada Muqdisho ayaa warbaahinta u sheegay in maalintii shalay Saraakiil iyo ciidamo ka tirsan
dowladda boob ka geysteen xerada oo ay
ka qateen dhowr gaari oo nuuca dagaalka ah kaddib markii ay xaruntaasi
baneeyeen Saraakiisha ka socotay dowladda Imaaraadka ee Tababarka ka bixin
jiray magaalada Muqdisho.
Wali ma jiro wax war ah oo ka
soo baxay dhinaca Imaaraadka oo ka hadlay boobka la sheegay in loo geystay
xerada, walow saraakiisha Militariga
qaarkood arintaa waxba kama jiraan ku tilmaameen.
C/raxmaan Diini, Hiiraan Online
[email protected]
