Reer galbeedka oo baaraya hubka kiimikada ah ee la sheegay in ay isticmaashay Suuriya
Axad, April, 15, 2018 (HOL) - Dalalka
Mareykanka,Faransiiska iyo Britain ayaa billaabay isku day cusub oo ay ku
doonayaan in baaritaan madax-bannaan lagu sameeyo eedeymaha ah in dowladda
Suuriya ay isticmaaleyso hubka kiimikada.
Saddexdan dal oo habeen hore weerar ku qaaday bartilmaameedyo
ku yaalla Suuriya ayaa golaha ammaanka ee Qaramada Midoobey u qeybiyay qaraar
qabyo qoraal ah oo ay ku doonayaan in muddo bil gudaheeda ay kooxda caalamiga
ah ee xakameynta hubka kiimikada ay warbixin ka soo saarto eedeymahaasi.
Mareykanka ayaa kal hore ku hanjabay in uu duqeymo dheeraad
ah ku qaadi doono gudaha dalka Suuriya, haddii xukuumadda madaxweyne Asad ay
sii waddo in ay adeegsato hubka kiimikada ah.
Dhanka kale, milatariga dalka Suuriya ayaa shaaciyay in uu gebi ahaanba la
wareegay gobolka bariga Duuma oo ay mucaaradku maamuli jireen.
Fallaagadii ugu dambeysay ayaa basas uga baxay magaalada
Duuma, iyagoo ku sii wajahan dhanka woqooyiga dalkaasi Suuriya
C/raxmaan Diini, Hiiraan Online
[email protected]
