Khilaaf ka jira xisbiga WADANI iyo xoghayihii guud ee xisbigaasi oo xilkii laga qaaday
Sabti, April, 14, 2018 (HOL) – Xisbiga mucaaradka ah ee
WADANI ayaa waxa maalmahan ka dhex jiray khilaaf u dhexeeya gudoomiyaha iyo
xoghayaha guud ee xisbigaasi.
Xoghayaha guud ee xisbiga WADANI Maxamed Uur-cade ayaa eeddo
u soo jeediyey gudoomiyaha xisbiga WADANI, waxaanu sheegay in loo baahan yaha
isbedel ku dhaca xisbiga si doorashooyinka soo socda guul u gaadho, taasina
waxay keentay in uu khilaafkii cirka isku shareero.
Guddida fulinta ee xisbiga WADDANI oo uu hogaaminayey
gudoomiye Cirro ayaa maanta shir degdeg ah iskugu yimid, waxaanay xilkii iyo
xubinimadii xisbigaba ka saareen xoghayaha guud ee xisbiga Maxamed Uur-Cadde.
“Xoghayaha guud ee xisbiga Uur-cade wuxuu isku direy
deegaanno iyo xisbiga, iyo siyaasiyiin iyo xisbiga, waxaa kale oo aad ka war
qabteen in go’aamo uu ka soo saaray xisbiga arrintii saldhiga Militari ee
Imaaraadka uu ka hor yimid, xoghayaha guud wuxuu jabiyey xeerkii xisbiga,
waxaanu dadafeeyey go’aamadii guddida fulinta, waxaanay dood dheer ka dib cod
gacan taag ah xilkii kaga qaadeen xoghayihi xisbiga Maxamed Cabdilaahi
Uurcade”ayuu yiri gudoomiyihii xisbiga C/raxmaan Cirro.
Khilaafkan ayaa ka dhashay ka dib markii gudoomiye Cirro
uu xoghayaha usoo jeediyey inuu xilka ku wareejiyey masuul kale, haseyeeshee uu
xoghayuhuna ka hor yimid inuu xilka wareejo, maadaama oo uu ku dooday in golaha
dhexe lagu doortay ay xilka ka qaadi karaan.
Barkhad-ladiif M. Cumar, Hiiraan Online
[email protected]
Hargeysa, Somaliland.