Sabti, April, 14, 2018 (HOL) –
War qoraal ah oo ka soo baxay wasaaradda arimaha dibadda ee dalka Qatar ayaa si
kulul loogu cambaareeyay Qarixii ka dhacay Garoon Kubadda lagu cayaaro oo ku
yaalla Magaalada Baraawe ee Caasimadda maamulka Koonfur Galbeed.
Wasaaradda
arimaha dibadda ee Qatar ayaa ku celcelinaysa sida ay ugu soo horjeedo isla
markaana u diidan tahay rabshadaha gacan ka hadalka ah ee argagaxisada ku
saleysan oo aan jirin wax sabab ah oo ka dambeeya.
Dowladda Qatar
ayaa sidoo kale, sheegtay in ay gebi ahaan ka soo hor jeedo beegsiga goobaha
dadweynaha iyo in dadweynaha la cabsi geliyo, waxayna tacsi u dirtay dowladda
Soomaaliya iyo qoysaska dadkii ku waxyeeloobay qaraxaas.
Al-shabaab ayaa qarax miino oo
ay ku aaseen garoon kubada cagta lagu cayaaro waxa ay ku dileen ilaa Afar qof,
halka ay ku dhaawaceen tiro intaas ka badan, kuwaasi oo u badnaa dhalinyaro.
Laakiin
dhinacooda waxaa ay sheegeen in weerarkaasi ka dhacay Baraawe ku dileen Askar ka tirsan ciidamada dowladda Soomaaliya.
C/raxmaan Diini,
Hiiraan Online
[email protected]
