Xildhibaannada Baarlamaanka oo ku kala aragti duwan cida u tartami karta Kursiga guddoonka Golaha Shacabka
Jimco, April, 13, 2018 (HOL)–Inkastoo laga faraxashay khilaaf siyaasadeedkii ka dhashay mooshinkii laga
keenay guddoomiyihii xilka iska casilay Prof Maxamed Cismaan Jawaari, mar kale
baarlamaanka Soomaaliya ayaa wajahaya khilaaf ka abuurmaya qodob sharciyeedka ah cida u
tartami karta xilka guddoomiyaha Golaha
Shacabka.
Xildhibaan Maxamed Cumar Dalxa
oo ka tirsan mudanayaasha baarlamaanka Soomaaliya ayaa sheegay in marka la eego
habka ay ku dhisan tahay dowladda ee 4.5 in kaliya kursigan u tartami karaan xildhibaannada ku abtirsada beesha uu
ka soo jeedo guddoomiyihii is casilay Prof Jawaari, isaga oo meesha ka saaray in cid waliba isku soo taagi karto qabashada xilka guddoomiyaha Golaha Shacabka.
‘’Waad og-tihiin Hirshabeelle
markii madaxweynaha la dooranayay waxaa la yiri ‘’Reer Hebel’’ oo kaliya ayaa u
tartami kara iyadoo la fiiranayo habka awood-qeybsiga sidaa daraadeed doorashada
guddoomiyaha Golaha Shacabka ma’aha mid u furan xildhibaan kasta , laakiin
waxaa u tartami kara oo kaliya beesha uu ka soo jeedo guddoomiyaha xilka ka
degay’’ ayuu yiri Prof Dalxa.
Laakiin aragti taa ka duwan waxaa qaba xildhibaan Mahad Maxamed Salaad oo sheegay in musharax kasta oo buuxiya
sharuudaha laga rabo in uu u furan yahay qabashada xilka guddoomiyaha
Baarlamaanka iyadoo aan loo eegin beesha uu ka soo jeedo, waxaana uu arin
sharci darro ah ku tilmaamay in beel kaliya sida uu hadalka u dhigay lagu
calaamadiyo in ay isku soo taagto guddoonka Golaha Shacabka.
‘’Dastuurkeenu kuma qorna in
xilalka lagu qeybsado 4.5 iyo qabiil, laakiiin wuxuu iska ahaa heshiis ama is
faham guud oo aan sharci ku dhisneyn, sidaa daraadeed doorashada guddoonka
Baarlamaanka waxey u furan tahay cid kasta oo soo buuxisa sharuudaha laga rabo''ayuu yiri xildhibaan Mahad Salaad
Labadan aragti oo ay kala
qabaan labada xildhibaan ee ka wada tirsan Golaha Shacabka ayaa hadda ah sheekada
ugu xiisaha badan marka la eego loolanka siyaasadeed ka dhax jira Baarlamaanka
Soomaaliya.
Warar soo baxaya ayaa sheegaya
in xildhibaanno ka tirsan garabkii sida weyn u taageeray Prof Jawaari
qorsheynayaan in ay isku soo taagaan qabashada xilka guddoomiyaha Golaha
Shacabka kuwaa oo marka awood qeybsiga beelaha ee dowladda Soomaaliya ku dhisan tahay la eego
ku heyb noqonaya ra’iisal wasaare Kheyre.
Ilaa iyo hadda
musharixiinta cadeeyay hankooda ah
qabashada xilka guddoomiyaha Golaha Shacabka ayaa ka soo jeeda dhamaantood
maamulka Koonfur Galbeed kuwaa oo loo arko in ay iyagu leeyihiin buuxinta kursiga uu banneeyay Jawaari.
Balse dagaal siyaasadeedka socda
awgii ayaa laga yabaa in ay jirin karaan xildhibaanno kale oo maalmaha soo
socda shaacin doona musharaxnimadooda kuwaa qaar ka mid ah durbaba siweyn dadku
u hadal hayaan.
C/raxmaan Diini,
Hiiraan Online
[email protected]