Khamiis, Aprril, 12, 2018 (HOL) – Agaasimihii guud ee wasaaradda
Qorsheynta horumarinta Somaliland Prof:Cabdi Cali Jaamac ayaa iska casilay
xilkii wasaaradaasi ka dib markii ay khilaafeen wasiirkiisa.
Agaasimaha is casilay ayaa sheegay in madaxweynuhu telefoon ku canaantay ka dib
markii wasiirku war khaldan u gudbiyey ka dibna uu madaxweynihii uu arki waayey
si uu iskaga difaaco eedda loo soo
jeediyey.
Mar uu sharaxayey sababta uu isku casilay waxa uu yidhi “Waxan garawsaday
in aad xaq u leedihiin in aan erayo kooban idinku sheego sababta aan xilka uga
tegay, taasoo ah sidan soo socota:
Madaxweynaha ayaa telefoon igula soo hadlay sabtidii; wuxu igu yidhi hadal
macnihiisu yahay (not literally) ha u mareexaanayn wasiirka!!! taas waynu isku
dilaynaa!!! Markii aan ku idhi madaxweyne aan kuu imaaddo oo aan is difaacana
wuxu yidhi laba cisho iga maqnaw, markaa shalay oo arbaca ah ayaan tegay.
Waxana la ii sheegay in aanay ballani ii oolin.”
Waxaanu intaas raaciyey “ Haddaba, shaqaalaha iyo dadka wasaaradduba way sheegi
xaqiiqada jirta ee anigu ma garanayo meel qawl iyo ficil midna aan ugu
mareexaaneeyay wasiirka, kumana jirto qiyamkayga, dadnimdayda iyo damiirkayga in aan ku dhaqmo
sifooyin ceynkaas ah.
Haddaba haddii Madaxeynuhu aaminsan yahay in dhaqankaasi aanu fiicnayn; Haddii
aniguna aanan ku sifoobin dhaqankaas oo la ii waayo qawl iyo ficil aan ku
mareexaanaynayo; ninka ashkatooday oo wasiirka ahi haddii isna uu aaminsan
yahay in dhaqankani xun yahay oo uu ka dhiidhiyay ,markaa su'aasha jawaabta u
baahani waxa weeyaan: yaa run sheegaya oo neceb dhaqankan?!!!!! ”.
Agaasimaha is casilay ayaa sheegay in madaxweynuhu ku canaantay in aanu
wasiirka u isticmaalin shaadhkiisa oo uu shaqadiisa ku ekaado, haseyeeshee
agaasimuhu wuxuu xusay in aanu dhaqan u lahayn inuu adeegsado awood aanu isagu
lahayn, sidaas darteed mar hadii arrintaasi
lagu edeeyey uu xilkii uu hayey iska casilay.
Barkhad-ladiif M. Cumar, Hiiraan Online
[email protected]
Hargeysa, Somaliland.
