Dowladda Soomaaliya oo sheegtay in ay la wareegeyso ciidamada uu tababaro Imaaaraadka
Khamiis,, April, 12, 2018 (HOL) – Tan wixii ka
danbeeyay dhawaan markii ay dowladda Soomaaliya la wareegtay lacag dhan $9 iyo
600 oo Kun oo dollar oo ka timid dalka Iskutaga Imaaraadka Carabta waxaa ay
muuqatay in uu sii xumaanayo xiriirkii aan markii horeba cagaha badan ku taagneyn
ee labada dowladood ee Soomaaliya iyo Imaaraadka.
Dowladda Imaaraadka ayaa ku eedeysay dowladda
Soomaaliya in ay si xun ula dhaqatay diblomaasiyiinteeda ku sugan gudaha dalkaa
kaddib markii sida ay hadalka u dhigeen lagu handaday garoonka diyaaradaha
Aadan Cadde si qasab ahna loogala wareegay lacag dowladda Imaaraadku ay ku
sheegtay in mishaar loo siin lahaa ciidamada ay ku tababaraan gudaha dalka
Soomaaliya.
Haddaba dowladda Soomaaliya ayaa si rasmi ah u
sheegtay in ay la soo wareegi doonto ciidamada ay gacanta ku hayaan Imaaraadka
Carabta ee ku jira dugsiga tababarka Gordan, laguna kala dari doono sida ay
sheegtay wasaaradda gaashaandhigga qeybaha kala duwan ee ciidamada xoogga
dalka.
Sidoo kale waxaa warka arintan ku saabsan ku
raacay wasaaradda taliyaha ciidamada xoogga dalka Soomaaliyeed Jen Cabdiwali
Jaamac Gorod oo sheegay in dowladda la soo wareegi doonto ciidamadan ay gacanta
ku hayaan Imaaraadka wixii hadda ka danbeeyana dowladdu bixin doonto
mishaarkooda.
Lacagtan ay Imaaraadku ku sheegeen in loo
istimcaali lahaa saadka iyo mishaarka ciidamada ayaa muran badan dhalisay,
madaama lagu soo beegay xili uu khilaaf siyaasadeed oo xoog leh uu ka dhax
taagnaa Golaha sharci dajinta iyo Fulinta dowladda Soomaaliya, waxaana jirtay
baqdin dowladdu ay ka qabtay lacagtan iyo cida ay ku soctay.
Ciidamada uu Imaaraadku ku tababaro gudaha dalka
gaar ahaan xerada Gordan ayaa marar badan oo hore shaki la galiyay cida ay dhab
ahaan ka amar qaataan, waxaana lagu eedeeyay in ay ka danbeeyeen weerarkii kol
hore lagu qaaday guriga Cabdi Xassan Cawaale Qeybdiid oo ah xildhibaan ka
tirsan Aqalka sare.
C/raxmaan Diini, Hiiraan Online
[email protected]