Madaxweyne Farmaajo oo la kulmay wafdi ka socday Qaramada Midoobey iyo midowga Africa
Axad, April, 01, 2018 (HOL) – Madaxweynaha Soomaaliya
Maxamed Cabdullaahi Farmaajo ayaa maanta si wadajir ah u qaabilay Guddiga
Qaramada Midoobay iyo Midowga Africa u qaabilsan dhaqaale u raadinta ciidamada
Midowga Afrika ee ku sugan Soomaaliya.
Madaxweyne Farmaajo ayaa la wadaagay
masuuliyantan ahmiyadda ay leedahay in lasii dardargeliyo wadashaqeynta AMISOM
iyo ciidamada xogga dalka Soomaaliyeed, dadaallada lagu xaqiijinayo sidii
kooxaha nabad diidka ah looga sifeyn lahaa dalka iyo in ciidamada Soomaaliyeed
loo diyaariyo qaabkii ay ula wareegi lahaayeen masuuliyadda amniga guud ee
dalka.
Wakiillada Qaramada Midoobay iyo Midowga Afrika
ayaa bogaadiyey qorshaha uu Madaxweynaha hormuudka ka yahay ee lagu tayeynayo ciidamada
xoogga dalka, iyagoona muujiyeey sida beesha caalamka uga go’antahay garab
istaaga dowladda Federaalka Soomaaliya.
Madaxweynaha iyo wakiillada ayaa isla soo qaaday
in Qaramada Midoobay iyo Midowga Afrika ay kala shaqeeyaan dowladda Federaalka
Soomaaliya dhaqaale u raadinta ciidamada Soomaaliyeed.
Madaxweyne Farmaajo oo dhawrkii toddobaad ee
lasoo dhaafay ku shaqeynayay xarunta wasaaradda Gaashaandhigga ayaa ahmiyad
sare siinaya dib u dhiska iyo tayeynta ciidamada qalabka sida.
Wafdigan waxaa hoggaaminayey Jean-Marie Guehenno
iyo Ramtana Lamamra oo madax u ah guddiga dhaqaale u raadinta ciidamada AMISOM
ee Soomaaliya, waxaana sidoo kale kulanka goob joog ka ahaa danjireyaasha
Qaramada Midoobay iyo Midowga Afrika ee Soomaaliya Michael Keating iyo
Francisco Madeira.
Dhinaca dowladda Soomaaliya waxaa kulanka ku
wehlinayay madaxweyna La-taliyaha Amniga Qaranka Cabdi Saciid Muuse.
C/raxmaan Diini,
Hiiraan Online
[email protected]