Axad, April, 01, 2018 (HOL) – Wararka naga soo gaaraya degmada Mahadaay ee
Gobolka Shabeellaha Dhexe ayaa sheegaya in ciidamo ka tirsan AMISOM, gaar ahaan
ciidanka Burundi ay isaga baxeen deegaanka Cali Fool-dheere oo saldhig ku
lahaayeen.
Ciidamada AMISOM ayaa gebi ahaanba soo faarujiyay deegaanka Cali Fooldheere
oo qiyaastii illaa 20KM u jirta Mahadaay.
Goob-joogayaal ku sugan degmada Mahadaay ayaa soo sheegaya in ay ciidamada ay
ka soo ruuqaansadeen Cali Fooldheere, kuna soo wajahan yihiin Mahadaay, iyadoo
la maqlayay madaafiic lagu ridayay dhanka howdka oo ahaa mid ciidamada jidka
loogu furayay.
Maalmo ka hor ayay aheyd markii dagaalamayaal ka tirsan Al-Shabaab ay weerar
ku qaadeen Kolonyo sahay u siday inta u dhaxeysa Mahadaay iyo Cali Fooldheere.
Ka bixitaanka Ciidamada AMISOM ee deegaanka Cali Fooldheere ayaa lagu
tilmaamay mid dib u gurasho ah, iyagoo ka cabsi qaba inay ku go’doomaan
deegaankaas, maadaama ay curteen roobabkii guga, isla markaana laga yaabo in
jidadka ay ku xirmaan.
Dagaalyahanno ka tirsan Al-Shabaab ayaa dib ula wareegay deegaanka Cali
Fooldheere, waxaana la soo sheegayaa in xaalada deegaanka ay tahay mid degan,
Shabaabkana ay ku sugan yihiin saldhiggii ay baneeyeen Ciidamada AMISOM.
C/raxmaan Diini,
Hiiraan Online
[email protected]