Khamiis, Janaayo,
26, 2017 (HOL) - Madaxweynaha Cusub ee Maraykanka, Donald Trump, ayaa shalay
Saxiixay Dhawr Sharci oo lagu xakameenayo muhaajiriinta soo galaaya
dalkaan, Sidoo kale Warbaahinta Maraykanka ayaa sheegtay in Trump uu shalay soo
saaray sharci uu ku adkeyn doono ammaanka soohdinta uu dalkan la wadaago Mexico
dhisina doono darbigii uu balanqaaday xiligii ololaha doorashadiisii.
Wararka ayaa sidoo kale sheegaysa in maamulka
cusub uu adkeyn doono dal ku-galka ay Maraykanka siiyaan muwaadiniinta todobo
dal oo Muslim ah, oo ay ka mid yihiin Somalia, Syria, Sudan, Iran, Iraq, Libya
iyo Yemen.
Cabdinaasir Mohamed Abdulahi oo ah Garyaqaan
Dagan Gobolka Minnesota ayaa HOL u sheegay in sharcigan hada yahay hakin kaas
oo ku kooban mudo kooban oo oo dhan Afar bilood ayna dowladu sheegtay in
baaris dhamaystiran ay sameenayaan.
Garyaqaan Cabdinasir Maxamed ayaa sidoo
kale yiri waxaa suurtogal ah in ay saamayso dadka Soomaaliyeed ee sugaayay in
dib u dajinta dalkaan ay ku yimadaan dhawaanahan,waxaa kaloo uu sheegay
in sharcigaan hada uu cusub yahay loona baahan yahay in aan dareenkeena
ka muujino sidaan uga xunahay hadaan nahay soo galootiga dagan dalkaan
Waxaa shalay Magaaladda Muqdisho
laga Dajiyey 90 qof oo laga celiyey dalkaan Maraykanka dadkaas oo mudo ku
jiray xabsiyada dalkaan ayaa loo diiday in la aqbalo codsigoodii ahaa
nabadgalyo iyo nolol doonka ay ku rabeen Maraykanka, Garyaqaan Cabdinasir
ayaa arintaan ku tilmaamay nasiib daro marka loo eego buu yiri sharciga
Maraykanka iyadoo Somaaliya aysan ka jirin dowlad damaanad qaadi karta
nabadgalyada dadkaas.
Ugu danbeyntii, garyaqaanka wuxuu kaloo
cadeeyay in hadii aysan raali ka hayn dowladda Soomaaliya ama Safaarada
Soomaalida ee Washington aan dadkaas dib loogu celiyeen Soomaaliya iyagoon
haysan wax waraaqo ah oo ay ku safri karaan.
Siyad Said Salah
[email protected]
Hiiraan Online
