Axad,
Janaayo, 01, 2017 (HOL) - Ra’iisul wasaaraha xukuumad Soomaaliya oo
weheliyaan xubno ka tirsan Aqalka sare ayaa kormeer ku tagey xafiisyo cusub oo
loo diyaariyey in ay ku shaqeeyaan Xubnaha Aqalka Sare ee Soomaaliya. Waxana ay kormeer ku tageen qaybaha kala duwan ee ka
kooban yahay dhismaha oo isgu jira Xafiisyo iyo Hoolka Shirarka.
Dhismahan ayaa waxa uu ku yaalaa degmada Shibis,
waxana dhisay Dawladda Turkiga, iyadoo loo qorsheeyey in uu noqdo xarunta ay ku
shiri doonaan Aqalka Sare ee Soomaaliya kuwaas oo horey dalkeena uga jirin.
Ra’iisul Wasaare Cumar Cabdirashid ayaa uga
mahadceliyey dawladda aynu walaalaha nahay ee Turkiga sida wanaagsan ee mar
waliba ay u garab taagan tahay Dawladda iyo Shacabka Soomaaliyeed, wuxuna
tilmaamay in dhismahani uu dabooli doono baahidii loo qabay xarun ay ku
shaqeeyaan Aqalka Sare ee Soomaaliya.
“Waxaan halkaan uga mahadcelineynaa Dawladda an
walaalaha nahay ee Turkiga ee gacan buuxda naga siisay dhismaha xaruntan cusub
naguna wareejisay, halkani waxay noqon doontaa dhismaha ay ku shiri doonaan
Xubnaha Aqalka Sare iyo xafiisyadii ay ku shaqayn lahaayeen”ayuu yiri Ra'iisal wasaare Sharm'arke.
Ugu danbeyntii, ra’iisal wasaare Sharm’arke ayaa
waxaa kormeerka ku weheliyey Senator Abshir Bukhaari, Senator Prof Cabdirisaaq
Xasan Cismaan Juurile iyo Senator Cabdi Axmed Dhuxulow Dhagdheer oo
dhammaantood ka mahadceliyey sida wanaagsan ee Dawladda Turkigu ugu wareejisay
dhismahan xarunta u noqon doona Aqalka Sare ee dalka.
C/raxmaan Diini, Hiiraan Online
[email protected]
