Maamulka Beledweyne oo u mahad celiyay xildhibaan Qoono gacan ka geystay dhismaha wado muhiim ah
Sabti, Feberaayo, 25, 2017 (HOL) – Magaalada Beledweyne
waxaa ka socda mashaariic dib loogu hagaajinayo goobaha danta guud ay ka mid
yihiin wadada oo halbowle u ah isku socodka dadka iyo gadiidka kadib markii uu
dhawaan maamulka gobolka Hiiraan daah furay mashuuraca [Ku dhiso dalkaaga Hal
Doolar ]
Xildhibaan Max’ed Xassan Ibraahim Qoono oo ka mid ah
mudanayaasha baarlamaanka Soomaaliya ayaa ku deeqay dhismaha wadadan ilaa 200
oo kiis oo shamiito ah oo sida ay maamulka degmada Beledweyne sheegeen wax weyn
ka tiri doonta dhismaha wadado muhiim ah oo laga wado bartamaha magaalada.
Maamulka degmada iyo guud ahaan howlwadeenada dhismaha
wadadan ayaa sheegay in deeqdan tahay tii ugu horeysay ee ka soo gaartay
xildhibaan ka tirsan baarlamaanka Soomaaliya tan iyo markii la daah furay
mashuurcan dib loogu dhisayo goobaha danta guud.
Maamulka ayaa ka dalbaday xildhibaannada baarlamaanka iyo guud
ahaan mas’uuliyiinta ka tirsan dowladda ee ka soo jeeda gobolka in ay ka
qeybqaataan dib u dhismaha goobaha danta guud.
Wadadan dhismaheeda laga wado magaalada Beledweyn ayaa isku
xiri doonta xaafadda Buundoweyn iyo xaafaddaha kale ee magaalada, waxaana uu
maamulka sheegay in marka la soo afjaro dhismaha wadadan loo soo jeesan doonto
dib u hagaajinta jidadka kale ee magaalada.
C/raxmaan Diini,
Hiiraan Online
[email protected]
