Dawladda Itoobiya oo 18 gaari oo mucaawimooyin cunto ka kooban ugu deeqday Abaaraha Somaliland ka jira
Jimco, Febraayo ,24, 2017 (HOL)- Dawladda
Itoobiya ayaa Somaliland ku wareejiyey 18 baabuur oo nooca isjiidka ah oo
caawimo loogu tallogalay dadka abaaruhu saameeyeen ee ku dhaqan bariga
Somaliland.
Raashinkan ayaa ka koobnaa 72 kun
oo tan, waxaanay sheegtay inay Itoobiya inay kala qaybqaadanayso gurmadka loogu
jiro dadka abaaruhu waxyeeleeyeen ee ku dhaqan Somaliland.
Raashinkan ayaa iskugu jira Saddex kun oo tan oo Sarreen ah, Toban kun oo
tan oo Bariis ah, Boqol tan oo Buskut nafaqeysan ah, Caano, Daqiiq Iyo Noocyo kale oo Raashin ah.
Xukuumadda Somaliland ayaa
caawimaddan kula wareegay munaasibad lagu qabtay magaalo xuduudeedka
Tog-wajaale, waxaana ka soo qaybgalay
wasiirudawlaha Arrimaha Dibadda Somaliland, guddida heer qaran ee abaaraha iyo
guddida heer gobol ee abaara.
“Waxaanu wadna caawimo aanu ugu tallogalnay inaaanu kaga
qaybqaadano gurmadka loogu jiro abaaraha ka dhacay Somalilad, waxa labadda
dalba ka jira abaaro, laakiin waxaanu nahay laba wadan oo daris ah oo ka wada
shaqeeya amniga, ganacsiga iyo isku socodka bulshadda,sidaas darteed ayaanu
caawimaddan idinku deeqnay”ayuu yidhi safiir ku xigeenka safaaradda Somaliland
ku leeyihiin Itoobiya oo raashinkan ku wareejiyey Somaliland.
“Itoobiya mar walba waxay
garab-taagan tahay Somaliland, xilliyadda adag, iyo marka caqabadahu la soo
gudboonaadaan.xidhiidhkan aan wadaagno Somaliland waa mid qoto-dheer oo cad,” ayuu
yidhi Mr. Ageze Amelo oo caawimadan ku wareejinayey Somaliland.
“halkan waxaan kula wareegayaa
mucaawimo ay inagu caawiyeen walaalaheena Itoobiya , isku dad baanu nahay oo
dadkeenii labaddii dhinacba way degan yihiin, abaaruhuna labadda dhinac way
jiraan, marka xidhiidh badan baa inaga dhexeeya”ayuu yidhi wasiirudawlaha
Arrimaha Dibadda Maxamed Mixiled Boqorle
Sidoo kale, waxa iyaguan ka
hadlay guddida heer gobol iyo heer qaran oo soo dhoweeyey caawimadda ka soo
gaadhay Dalka Itoobiya.
Abaaraha Somaliland ka jira ayaa
ah kuwo ka sii daraya, waxaana laga dayrinayaa dad iyo duunyaba inay sahayato
abaartan oo gaadhay heer geelliii gaajo iyo macaluul u dhintaan.
Barkhad-ladiif M.
Cumar, Hiiraan Online
[email protected]
Hargeysa, Somaliland.
