Arbaco, Feberaayo, 22, 2017 (HOL) - Ra’iisal
wasaaraha Itoobiya Hailemariam Desalegn oo ka mid ahaa wafuudii
caalamka ee maanta ka qeyb-gashay munaasabadii caleemo saarka madaxweynaha Soomaaliya, ayaa sheegay in ay garab taagan yihiin dowladda cusub ee
Soomaaliya.
Sidoo kale ra’iisal wasaaraha ayaa sheegay in ay la shaqeyn
doonaan madaxweynaha la doortay ee Soomaaliya Maxamed
Cabdulaahi Farmaajo.
Waxaa kaloo uu khudbadiisa ku sheegay in uu jecel yahay mar
walba in labada dowladood Soomaaliya iyo Itoobiya ka wada shaqeeyaan
xasiloonida iyo nabad-galyada guud ahaanba wadamada gobolka.
Ra’iisul wasaaraha ayaa sheegay in madaxda Soomaalida ay taariikh weyn dhigeen, waxaa uu ka hadlay in Soomaalida uun ay go’aan ka gaari lahaa mustaqbalkooda,
Waxaa uu madaxweynaha cusub ku bogaadiyay doorashada isagoo ballan-qaaday in isaga iyo shacabkiisa ay garab istaagaan sidii nabad iyo xasilooni loogu soo dabaali lahaa.
Gaar ahaan waxaa uu u mahad celiyay madaxweynihii hore ee Soomaaliya Xassan Sheekh Max’uud oo sida uu hadalka u
sheegay soo gaarsiiyay dalka marxalad wanaagsan.
Ugu danbeyntii, ra’iisal wasaaraha ayaa hadalkiisa ku soo
gabagabeeyay ‘’Hambalyo Soomaaliya Hambalyo’’ isaga oo markaa adeegsanayay luuqada afka
Soomaalida.
C/raxmaan Diini, Hiiraan Online
[email protected]