Hargeysa:Taliska Ciidanka Booliska oo ka hadlay xadhiga laba wariye iyo SOLJA oo cambaaraysay
Talaado,Febraayo ,21 , 2017 (HOL) – Taliska ciidanka
Booliska Somaliland ayaa ka hadlay xadhiga agaasimaha TV-ga STAR TV Maxamed
Baashe Xaaji Xasan iyo wariye Cabdimaalik Muuse Coldoon, waxaanay sheegeen inay
maxkamadda hor keeni doonno.
Afhayeenka Booliska Somaliland Faysal Xiis ayaa sheegay in
agaasimaha star tv Maxamed Baashe loo xidhay inuu ku kacayy falal kicin
dadweyne iyo khalkhalgalin amniga, isla markaana ka baxay shaqaddii suxufinimo,
halka wariyaha Cabdimaalik Muuse Coldoona ku eedeysan yahay qaran dumis,isla
markaaana faafiyey warar been abuur ah.
“Ciidanka boolisku
waxay xidheen eedeysane Maxamed Baashe Xaaji Xasan oo ah agaasimaha Star
tv,kaasi oo lagu eedeynayo inuu ku kacay falal ah kicin dadweyne, khalkhalgalin
amni,isla markaana ka baxay mihnaddii saxaafadda ka dib markii uu ka hor yimid
mashruucii madaarka Berbera ee labadda gole qaran cod caqlabiyad leh ku
ansixiyeen”ayuu yidhi Faysal Xiis oo ka faahfaahinayey sababta loo xidhay
wariye Maxamed Baashe.
“ eedeysanne Maxamed Baashe wuxu qaban qaabinayeyy shir lagu
qaybinayey waraaqo lagu kicinayey dadweynaha wuuna xidhan yahay may ahayn inuu
galo wax aan shaqadiisa ahayn oo dambi ciqaabeed ayuu galay si degdeg ah waxa
loo hor gaynayaa maxkamada”ayuu hadalkiisa raaciyey.
Afhayeenka Ciidanka Booliska Faysal Xiis oo isna ka hadlayey
xadhiga Wariye Coldoon waxa uu yidhi “ciidanka boolisku waxay bishii labaad, 15-keeddii ay gacanta ku
soo dhigeen eedeysanne Cabdimaalik Muuse Coldoon, kaasi oo lagu eeeyey inuu ka
hor yimd jiritaanka qaranimada Somalilad oo uu faafineyy warar been ah oo aan
sal iyo raad doona lahayn”.
“Wuxuu ahaa nin qaran dumis ah oo ka hor yimid qaranimadda
Somaliland, waxaana marag muujin u ah oo laga arki karaa Baraha bulshada isku
aragto marka loo baahana waxa la hor geyn doona Maxkamadda”ayuu yidhi.
Dhinaca kale, gudoomiyaha ururka Saxaafadda Somaliland,
Maxamuud Xuuto ayaa cambaareeyey xadhiga agaasimaha Star tv iyo mulkiilaha
UNIVERSAL iyo Wakiiladda Universal ee Somaliland oo iyaguna shalay lagu xidhay
xarunta dambi baadhista ee magaaladda Hargeysa oo markii ay habeen xidhnaayeen
la iska sii daayey.
“waxa xalay lagu xidhay agaasimihii tv-ga STAR TV, doraadna
waxa magaaladda Hargeysa lagu xidhay oo markii dambe la siidaayey mulkiilihii
UNIVERSAL TV iyo wakiilka Somaliland u jooga,, labadda dhacdo waxaanu u aragnaa
xad gudub lagula kacay xoriyatul qawlka, tusaale ahaan mulkiilaha UNIVERSAL
Eng:Axmed Abubokor iyo Xuseen Caabi oo ah wakiilka Somaliland u jooga tv-gaasi
sirdoonka gobolka Maroodi jeex baa xidhay, iyagoo sifo sharci ah u marin
xadhigiisa, sharciguna wuxuu dhigaya in maxkamad awood u leh ay wariyeyaasha
xidhi karaan, hore sirdoonku way iska xidhaan, markii dambana way iska sii
daayeen, marka waanu cambaaraynaynaa falalka sharciga ka baxsan ee lagula kacay
wariyeyaasha”ayuu yidhi gudoomiyaha SOLJJA Xuuto oo ka hadlayey xadhiga
wariyeyaasha ee soo noqnoqonaya.
Barkhad-ladiif M. Cumar, Hiiraan Online
[email protected]
Hargeysa, Somaliland