SAWIRRO: Shariif Sh. Axmed oo dib u dhigay ku dhawaaqida Musharraxnimadii Madaxweynaha
Khamiis, September
22, 2016 (HOL) — Madaxweynihii hore ee Somalia, Sheekh Shariif Sh. Axmed oo
maanta dib ugu soo laabtay Magaalada Muqdisho ayaa sheegay inuu dib u dhigay ku dhawaaqida musharraxnimadii madaxweynaha, kaddib hadal uu u jeediyay qaar ka mid ah taageerayaashiisa.
Shariif Sh. Axmed oo maanta
la filayay in uu Musharaxnimadiisa kaga dhawaaqo Muqdisho, ayaan la ogeyn
sababta uu dib ugu dhigay, iyadoo lagu wado in si rasmi ah uu ugu dhawaaqo
musharraxnimadiisa maalmaha soo socda.
Dadweyne fara badan ayaa soo
dhaweeyay Sh. Shariif oo muddo dalka ka maqnaa, kuwaasoo watay Boorar iyo Sawirradiisa, isagoo markii uu yimid uu shacabka isaga taageersan la qaatay
kulan uu uga warbixinayay dib u soo laabashadiisa.
Imaatinka Sh. Shariif ee
Muqdisho ayaa wuxuu kusoo beegmayaa xilli la filayo in maalmaha soo socda ay Somalia
ka billaabato soo Xulista Xildhibaannada labada Aqal ee baarlamaanka cusub ee dalka.
Ugu dambeyntii, Sheekh Shariif
ayaa wuxuu ku biiri doonaa musharraxiinta xilligaan u taagan madaxweynaha
Somalia, isagoo horay looga adkaaday doorashadii 2012-kii dhacday, waxaana kaga
guuleystay madaxweynaha hadda xilka haya Xasan Sh. Maxamuud.
Maxamed X. Xuseen, Hiiraan Online
[email protected]
Muqdisho, Soomaaliya
